Khedira-a'n a chawlh thu a puang

Hertha Berlin mid-fielder Sami Khedira-a'n tun season tawp hunah football khelh a chawlhsan tur thu a puang.

Kum 34 mi Khedira hi Germany-in FIFA World Cup 2014 an champion ṭum khan player pawimawh a ni a; La Liga, Serie A leh Bundesliga nomawi a chawi vek.

Stuttgart-a piang Khedira hian an khaw club VfB Stuttgart-ah bul ṭanin 2006-07 season khan a champion pui a, Germany U21-in kum 2009-a Euro U21 inelnaa an champion khan captain a ni.

Kum 2010 khan Khedira hian Real Madrid zawmin La Liga (1), Champions League (1), Copa del Rey (2), Supercopa de Espana (1), UEFA Super Cup (1) leh FIFA Club World Cup (1) ah a champion pui vek.

Spanish club lian aṭangin Juventus a zawm leh a, Khedira hian Serie A nomawi panga bakah Coppa Italia nomawi pathum a chawi. Khedira hi inhliamin a buai ve reng. Tun season-ah Turin club tan a la inlan lo a, February thla khan Hertha Berlin zawmin inhliam vangin league match riat chiah a khel a ni.