Premier League Hall of Fame-a hriat kim ta Steven Gerrard leh David Beckham lakluh an ni

Football khawvela league ngaihven hlawh ber tih ngam Premier League Hall of Fame-a lut tur hming puan kim a ni ta a, nimin khan Liverpool legend Steven Gerrard leh Manchester United star ṭhin David Beckham-te chu lakluh an ni.

Premier League Hall of Fame hian a hmasa berah player pahnih an lalut nghal a, English legend Alan Shearer leh Arsenal fan-ten 'King Henry' tih hiala an koh Thierry Henry-te chu lakluh hmasak ber an lo ni tawh.

English top flight league sang ber hian player 23 dang hming an chhawpchhuak zui a, heta ṭang hian fans leh Premier League Panel-ten player paruk an thlang chhuak zui.

Gerrard leh Beckham hma hian Eric Cantona, Roy Keane, Frank Lampard leh Dennis Bergkamp-te chu lakluh an lo ni tawh a, Premier League Hall of Fame-ah player pariat lakluh an ni tihna a ni - Hall of Fame-a lang tur hian 1 August 2020-a chawl tawh nih a ngai a, Premier League-a an career chiah thlir a ni bawk.

Captain Fantastic
Premier League Hall of Fame-ah Gerrard lakluh a ni a, Liverpool captain ropui hian Premier League nomawi a chawi loh thu sawi rik zui a ni.

Mahse, Gerrard hi Premier League nomawi ni lo, mimal anga en chuan Premier League-ah ani aia player ropui sawi tur bik an awm chuang lo - Anfield-a season 17 hun a hman chhungin PFA Team of the Year-ah vawi riat a lang thei a, ani aia lang hnem an awm lo.

Liverpool tan rinawm a thlan avanga Bayern Munich, Chelsea, Real Madrid leh Manchester United-te lo hnar tawhtu Gerrard hian Premier League-ah match 504 khelin goal 120-a khung a, assist 92-a nei bawk.

Team-a kaihhruai thiam avanga 'Captain Fantastic' hming lem an pek hian October 2003 aṭang khan Liverpool captain dinhmun a luah ṭan a, amah siam liantu club hi Champions League (1), FA Cup (2), League Cup (3), Community Shield (1), UEFA Cup (1) leh UEFA Super Cup (1)-ah te a champion pui.

Mimal chawimawina
Stevie G tia fans tam takin duat taka an koh hi 2000-01 season khan PFA Young Player of the Year-ah thlan a ni a, 2005-06 season khan PFA Players' Player of the Year-a ni bawk.

PFA Fans' Player of the Year (2000-01 & 2008-09) ah vawi hnih thlan a ni a, England Player of the Year (2) vawi hnih a ni thei a, FIFA FIFPro World XI leh UEFA Team of the Year-ah ṭum thum ve ve a lang a, UEFA Team of the Century-ah hial a lang bawk.

Scottish Premiership-a hneh taka Rangers champion puitu Gerrard-a mimal lawmman dawn zawng zawng siah sen a ni lo. Champions League 2005 final-a AC Milan laka 3-0 a an hnufual hnua a team a 'comeback' pui chu tun thlenga football thawnthu tingaihnawmtu a ni.

FA Cup, League Cup, Champions League leh UEFA Cup final-ah goal a khung vek tawh a, hetiang ang ti ve thei player hi tun thlengin an la awm rih lo. Premier League 20 Seasons Awards-ah khan Fans Teams of the 20 Seasons-ah a tel bawk.

A hming Beckham
Manchester United player chherchhuah zinga lar ber tih ngam Beckham-a'n a hmelṭhatna a larpui em avangin a football thiamnain sawi a hlawh tawk lo a, a thiamna sawi nep erawh a rem lo.

Red Devils tan a khelh chhungin league match 265-a khelhsak hman a, goal 62 a khung a, assist vawi 80-a nei - a ball pet thiam bikna chu a larpui ber a ni a, United tan Premier League nomawi vawi ruk a chawi hman.

Champions League (1), FA Cup (2) leh Community Shield (2)-ah Beckham hi a champion bawk a, kum 1999-a treble champion an nihna kawnga player pawimawh zingah a tel phak.

Beckham hian United tana career duhawm tak a hman hnuah Real Madrid, LA Galaxy, AC Milan leh Paris St-Germain tan a khel leh a, kum 2013 khan inkhelh a chawlhsan - Spain, USA leh France-ah league nomawi a chawi a, English player zinga ram palia champion thei awmchhun a ni.

Mimal chawimawina
Beckham hian a mimal ang pawhin chawimawina a dawng hnem hle - PFA Young Player of the Year (1996-97) ah thlan a ni a, kum 2003 khan England Player of the Year a lo ni tawh bawk a ni.

UEFA Team of the Year-ah vawi hnih a lang a, PFA Team of the Year-ah vawi li ngawt a lang a, Premier League 10 Seasons Awards, April 2003-a semah khan Domestic & Overall Team of the Decade-ah a lang a, August 1996-a Wimbledon laka a goal ropui chu Goal of the Decade-ah thlan a ni bawk.

Beckham chuan, "Premier League Hall of Fame din a nih kuma ka tel nghal thei hi ka lawm a, ka career atana pawimawh em em league-a ka khelhpui, elpui leh entawn ṭhin ropui tak tak zinga ka hming a awm ve hi ka inchhuang hle a ni," a ti.

England Captain hlui chuan, "Fan-ten he chawimawina huanga tel tur an thlang ve tih ka hriatna hian minti lawm lehzual," a ti zui a, fan-ten Premier League player ropui pariat zinga an chhiar tel chu a inchhuang hle.