German football roreltu Bayern Munich

Tun season Bundesliga league match hnuhnung ber chu Inrinni zan khan khelh a ni a, Bayern Munich-in Augsburg an hmachhawn hmain club chhuahsan tur player leh coach-te an thlah. Allianz Arena-ah entu 250 chauh an awm a, Bavarians hian Augsburg 5-2 in an hneh.

Inkhel chu
Augsburg player Jeffrey Gouweleeuw-a'n minute kuana lekah an lamah a khung a, Bayern tan Serge Gnabry, Joshua Kimmich leh Kingsley Coman ten first half-ah an khung belh. Second half-ah Augsburg tan Andre Hahn leh Florian Niederlechner ten an khung belh a, goal ruk luh hnuah pawh goal khung khawl Robert Lewandowski hming a la lang lo.

Minute 90-naah record siam turin Lewy a rawn lang a, goal ropui khung lo mah se goal pawimawh a khung. Polish striker hian Bundesliga season khat chhungin goal 41 a khung a, Gerd Muller-a record khumin record thar a siam.

Bayern leh arsi panga
Bayern hi a vawi 31 nan German champion an ni a, Bundesliga bikah vawi 30 champion tawhin tun hnai kum kua chhung a zawnin an champion bawk.

Germany-ah Bayern elpha reng an awm lo. Thomas Muller leh David Alaba ten record siamin vawi 10 ve ve a champion a, Alaba hi kum 28 mi chauh a la ni. Bavarians hian Juventus nih rualin a vawi kua nan an champion a, Turin club erawh tun season-ah a zawna vawi 10 champion theihna hun ṭha an bawhpelh.

Manuel Neuer-a'n goalkeeper record a siam a, Oliver Kahn-a record vawi riat khumin a vawi kua nan a champion. Bayern-in a zawna vawi kua an champion ṭum hian Neuer bakah Alaba, Müller, Jérôme Boateng leh Javi Martínez te an tel vek.

French forward Kingsley Coman hi kum 24 mi lek a ni a, league title pakua a nei der tawh. Coman hian PSG vawi hnih (2013 leh 2014) a champion pui a, kum 2015-ah Juventus champion pui lehin Bayern a zawm a, league nomawi chawi chu tih ṭhin dan pangngaiah a nei zui a ni.

Bayern hian Bundesliga nomawi vawi 30 nan an chawi a, season thar aṭang chuan an kawr hmaah arsi panga an dah tawh ang.

LewanGO41ski-a'n record a siam ta
Bundesliga-ah team 18 chiah an awm avangin season khatah match 34 chauh a awm a, goal 40 khung hi thil harsa a ni. Gerd Muller chuan kum 1972 khan season khatah match 34 khelin goal 40 a khung a, Bayern legend record khum hi thil theih loh anga ngaih a ni.

Amaherawhchu kum 49 hnuah Lewy hian match 29 khelin record hi a rawn khum a, Augsburg nen pawh hian goal hmaah a hlauhawm hle. Bayern striker hian Augsburg tlarhnung hi vawi tam a rum ṭhaih a, a vanduai tlang dawn emaw tih hnuah a phu ang ngeiin hun tawp dawnah goal khungin Lewy hian record a siam. Polish hian a record siam hi a nu Iwona tan a hlan.

Goal a khung chiah hian captain Manuel Neuer chuan corner flag bulah Lewy goal khung a va lawmpui hman a, hei hian thil awm dan a sawifiah. Kum 32 mi Lewandowski chuan, "Chawl loin ka beisei ṭhin. Goal 41," tiin twitter-ah a ziak a, record a siam theih chhan hi a thiam vang piah lamah a rilru huaisen vang liau liau a ni.

Germany enkawl tur Flick
Hansi Flick chuan thla 19 hnu lek Bayern Munich a enkawl hnuah a chhuahsan dawn a, no­mawi pasarih a chawi hman. Flick-a rual hian amah puitu kum 2018 aṭanga coach ni ṭan Miroslav Klose leh kum 25 chhung Bayern coach ni tawh Hermann Gerland te an chhuak bawk dawn.

Bayern-in Hansi Flick-a thlakna tur atan RB Leipzig boss Julian Nagelsmann an biak fel tawh thu April thla khan an puang tawh a, Flick-a kalna tur a la chiang lo. German manager hi Barcelona nen sawi zawm ni mah se Germany team enkawl tura ngaih a ni.

Kum 56 mi Flick chuan, "DFB nen kan inbe tawh. Tute pawhin national team ka ngaihhlut zia chu an hria ang. Inremna kan nei hnai a, thu chiang a awm theih vat ka beisei," tiin a sawi.

Mangṭha legend
Season tawp rualin Bayern Munich player pathum David Alaba (kum 13 chhung), Jerome Boateng (kum 10) leh Javi Martínez (kum 9) te an chhuak dawn a, club legend-te thlahna hun an hmang a, player pathum inkhel bul an ṭan vek bawk.

Bayern CEO Karl-Heinz Rummenigge, club president Herbert Hainer leh sporting director Hasan Salihamidzic ten heng player-te hi an nomawi chawi zawng zawng leh anmahni thlalak chuanna 'frame' mawi tak an pe.
Captain Manuel Neuer pawhin player pathum hi nomawi chawinnaah a kian. Player pathum Alaba, Boateng leh Martinez te hian nomawi an dawm vek a, an chawi rual.

Boateng hian khelmual a chhuahsan pahin a mittui a hru. Bayern chuan, "A tawp tak avangin ṭap suh. A thlen avangin lawm zawk rawh. Boateng kan hmangaih che," tiin twitter-ah an thlah. Bavarians hian, "Kan zinga mi i ni kum khua ang," tiin Alaba an thlah. Spanish midfielder Javi Martinez pawh, "Javi kan lawm e," tiin Bayern hian an thlah ve bawk.