Mizo inchai chak Amawitea a thi

Mizoram Wrestling Association hnuaia Palian inchai champion naupang ber record lo siam tawh Lalhmingmawia Fanai chu Inrinni zan dar 11:30 khan District Hospital, Kolasib-ah a thi a, kum 34 mi a ni.

Amawitea tia hriat lar, Kolasib tlangval hi Sport Authority of India (SAI) hnuaia inzir chhuak a ni a, a tirah weight­lifting lamah kal mah se coach-te thurawn angin wrestling a luhchilh ta zawk.

SAI-a kum khat a awm hnuah Palian inchai hmachhawn thei tur contender fight-ah a champion a, kum 2008 khan hetihlaia Palian champion LR Bawlliana, Chanmari chu hmachhawnin a champion nghal a, kum 20 mi lek niin Mizo Palian inchai champion thei naupang ber record-a siam.

Kum 2009-ah PB Lalnienga, Saitual nen an inhmachhawn a, a title a humhim leh bawk - Amawitea hian Mizo­ram aiawhin SAI Wrestling Cham­pionships, North East leh national huap inelnaahte medal-a lo hlawh chhuak nual tawh bawk.

Mizoram Wrestling Association chuan, "MWA tan chuan channa leh tawrhna nasa tak a ni," tiin Amawitea thlahna thuchhuah an siam.