NBA Playoff : Nets leh Bucks ten hnehna an chang

Inrinni zan, keini lama Pathianni zing aṭangin NBA playoff khelh ṭan a ni a, champion tura rinkai Brooklyn Nets chuan an khingpui Boston Celtics lakah 104-93 in hnehna an chang a, inkhel dangah Milwaukee Bucks an chak bawk.

Nets hian player ṭha pathum 'Big Three' tia sawi - Kevin Durant, Kyrie Irving leh James Harden te an nei, anni pathum hi hliam vangin an inlan rual tam lo, a vawi kua nan an khelho chiah a, an pathuma point an neih belhkhawm chu 82 zet a tling.

Eastern Conference hmahruaitu Nets tan hian Durant (32 points), Irving (29) leh Harden (21) te hi an khel fuh chho zel a nih chuan dan an harsa khawp ang. Seeded pasarihna Boston tana point nei hnem ber Jayson Tatum (22) chu chak pui nan a tawk zo lo.

Miami Heat aṭanga Nets zawmtu Harden chuan, "Hnehna chang tura kan beih dan khan min ti lawm. Chutih rualin playoff a nih tawh avangin engkim kha duh angin a kal vek thei lo tih hriat a ngai," tiin a thiam vek inlena chu a awlsam loh thu a sawi.

Eastern Conference playoff lamah Milwaukee Bucks leh Miami Heat an inkhel tawk hle, over time zawh hma 0.5 second chauh awm tawhah Bucks lamin point neih belh zauhin 109-107 in hnehna an chang thei hram.

Playoff game 1 inkhel dangah Dallas Mavericks leh Portland Trail Blazers te chuan hnehna an chang bawk a, best of seven series-ah 1-0 in hma an hruai. Thawhlehni zingah game 2 an khel chhunzawm leh ang.

Stephen Curry awmna Golden State Warriors erawhin an tum ram an thleng zo lo. Inrinni zing khan Play In Tournament khelin, over time khelh a nih hnuah Memphis Grizzlies chu 117-112 in an ngam lo a, playoff an beiseina chu a thamral.