La Liga champion Atletico Madrid

Spain-ah Atletico Madrid aia thiam an awm lo. Ni e, an awm lo - La Liga league match 38 chu khelh zawh a ni ta a, heti zat match khel team 20 zingah Atletico aia point (86 points) hmu sang zawk an awm lo.

Atletico Madrid hian an mikhualna ramah Real Valladolid chu 2-1 in an hneh a, an champion. Valladolid tan Oscar Plano chuan goal hmahruai khung mah se Atletico-in Angel Correa leh Luis Suarez hmangin an chhang let a, 2-1 in an chak.

Diego Simeone-a naute tan kum sarih hnua league nomawi an chawi lehna hmasa ber a ni a, La Liga-a vawi 11 an champion-na chiah a ni bawk - Valladolid erawh second division lamah an tla thla a, team pahnih mittui tla ve ve mah se a tlak dan erawh a inang lo.

Atletico elpui Real Madrid chuan 2-1 in Villarreal an hneh ve bawk a, mahse, Atletico an chak miau avangin Zinedine Zidane-a naute tan an chakin awmzia a nei lo - champion tur chuan kum khat dang nghah leh phawt a ngai dawn.

Boruak a 'hot'
Inrinni zana Atletico leh Real inlan hmain champion thei team pahnih an awm - Atletico tan chak a tawk a, Real an chak a, Atletico-in point an hloh chuan Madrid an champion dawn thung.

Real Valladolid neitu hi Real legend, Brazilian striker ropui ṭhin Ronaldo a ni a, a team hian an chak chuan La Liga-a inhamtan theihna dan an neih tel bawk avangin an chak chuan player-te sum tam tham tak pek a tiam thu thlengin Spanisn media-ten an tarlang.

Minute 18-naah beisei loh takin Valladolid hian Plano hmangin goal an rawn khung zui - hetihlai hian Real leh Villarreal chu goal khung loin an inhnehtawk mek a, hliam vanga inlan thei lo Real captain Sergio Ramos-a'n Valladolid goal khung a hriat rualin a lawm.

Mahse, Ramos hlim chhung a rei lo - minute hnih a liam a, Villarreal-in Yeremi Pino hmangin an khung ve leh a, team pahnih an tlawm ve ve chuan champion tur chu Atletico an ni.

A hming Suarez
Goal lut loin chawlhlawk hman a ni a, Atletico leh Real fan-ten hlauthawng takin hun an hmang - second half-ah Madrid fan-te hlauh a thleng a, Atletico-in an zia tak tak chhuahin goal an khung.

Angel Correa chuan Atletico tan si phurh sutna goal minute 57-naah a khung a, first half hmang chhe tak Atletico an inringtawk sawt - minute 10 a liam a, Luis Suarez hun a thleng.

Kum 33 mi striker, Barcelona duh loh hnu hian top level-a khel turin theihna a la nei tih a pholang nawn a, 'cool' zetin an goal hnihna a khung - goal an chhuah loh chuan an champion dawn tih a chiang.

Real-in minute 87 hnuah Karim Benzema leh Luka Modric hmangin Villarreal chu 2-1 in an lehthal ve leh a, mahse, Atletico-in goal dang an chhuah tawh loh avangin an champion-na kalkawng a dal phak lo.

Luis Suarez mittui a far
Atletico-in league nomawi an chawi a, Luis Suarez chanchin chu sawi zui hlawh ber a ni nghal - Uruguayan striker hian inkhelh zawh hnuah mittui nen a phone a la a, video call hmangin a chhungte a bia. A mittui a luang a, lawmna vang a ni thung.

Nipui transfer lai khan Suarez hi Barcelona boss thar Ronald Koeman chuan phone hmangin a mamawh tawh loh thu a hrilh a, a vanglai hun zawng zawng Catalan club tana hlantu Suarez tan chuan 'na' tak a ni.
Kum 33 mi striker hian hetihlai hian Nou Camp-a cham hram dan a ngaihtuah a, Barca thuneitute hnenah a chamna tur a nih chuan a hlawh tihhniam pawi a tih loh thu a hrilh a, squad player satliah nih thlengin pawi a ti lo!

Mahse, Barcelona-in club tan match 283-a khelha goal 198 khungtu striker hi mamawh an inti tawh lo. Club tana a hnathawh zozai enin Barca-in Suarez an tih dan hi mak tih loh rual a ni lo a, a ṭhian ṭha Lionel Messi pawh a ṭawng chhuak hial.

Messi chuan, "He club tana i hnathawh zawng zawng ngaihtuah hian mawi taka thlah liam i phu a, an tih dan che hi a mawi lo takzet a ni," tiin a ṭhianpa thlavang hi a hauh hial. Kum 33 mi striker hian a hun tawn thim tak hi thlir kirin, "Ka hun tawn kha a hrehawm takzet," a ti a, a mittui a luang ngiai ngiai a.

Uruguayan striker chuan sawi zawmin, "Na taka hnuaichhiah ka ni a, mahse, Atletico hian ka tan an kawngkhar an lo hawng a ni," a ti a, a champion pui tak club hnenah lawmthu a hrilh. Suarez chuan sawi zawmin, "Khatihlai kha football-a ka hun tawn thim ber a ni hial ang. Ka chhungte, ka nupui leh ka fate khan hrehawm an ti em em vek a, hetianga season khar chu nuam tak a ni," a ti.

Uruguay international Suarez hian league match 32-a khelhah goal 21-a khung a, assist vawi thum a nei bawk - a goal khung zinga 17 chu Atletico hian point 35 hlawhchhuah nan an hmang a, Atletico champion theih nana player thawhhlawk tak a ni.

Suarez & Simeone an cham dawn?
Atletico an champion ruala zawhna awm nghal chu Luis Suarez leh coach Diego Simeone hma hun a ni a, Atletico president Enrique Cerezo chuan a player leh coach hma hun chu an kuta awm a nih thu a sawi.
Cerezo chuan, "Luis Suarez hi player ṭha bik, sawiselna tur awm lo a ni. Player ropui tak, goal khung thei tak a ni a, a cham dawn leh dawn loh min zawt a nih chuan a kutah engkim a awm.

"Suarez hian contract a la nei a, a hma hun turah a rilru a buaiin ka ring lo," a ti a, Liverpool lama kir leh tur anga sawi a striker chu a cham a rin thu a sawi - Suarez hian season ṭan dawna Atletico-a zawm khan kum hnih atan contract-a ziak.

Cerezo chuan a coach Simeone chungchang sawi zuiin, "Thutlukna chu a kuta awm a ni a, chhunzawm a duh chuan a chhunzawm zel thei ang. Mahse, cham a duhin kei chuan ka hria," a ti a, Argentine coach chu chelh theih a inbeisei.

Kum 51 mi Simeone hian December 2011 aṭang khan Atletico hi a enkawl tawh a, La Liga-ah vawi hnih a champion-na niin Copa del Rey (1), Supercopa de Espana (1), Europa League (2) leh UEFA Super Cup (2)-ah a tem hi a champion pui tawh a, Champions League final vawi hnih a luhpui bawk.

"Khawvelin hun thim tak a tawng mek a, hetiang boruak kara midang tana hlimna kan thlen thei hi kan tan chuan a hlu takzet. Kan champion-na kawngah player 32 zetin tha an thawh a, kan pawimawh dan a inang vek a ni. Ka hlim takzet". - Diego Simeone, Atletico Madrid coach

La Liga Chhehvel
* Eibar, Real Valladolid leh Huesca-te chu an relegate a, season tharah chuan Segunda division lamah lungawi an zir ang.
* Inrinni zan inkhelh hma hian Valladolid leh Huesca-ten La Liga-a cham chhunzawm beiseina an nei ve ve. Mahse, Huesca-in Valencia an inhnehtawkpui a, Valladolid-in Atletico an ngam lo bawk.
* Valladolid kha lo chak ta pawh ni se Elche an chak avangin an inhamtang thei chuang lo a, Huesca pawh head-to-head a Elche an tluk chuan loh avangin chak pawh ni se an tla tho ang.
* Espanyol leh RCD Mallorca-te chu Segunda division aṭanga La Liga khel tura tling chiang an ni a, Leganes, Almeria, Girona leh Sporting Gijon-ten hmun ruak pakhat la awm chu playoff hmangin an inchuh leh ang.
* Atletico Madrid, Real Madrid, Barcelona leh Sevilla-ten season tharah Champions League an khel ang.
* Real Sociedad leh Real Betis-ten Europa League an khel ang a, Villarreal-in Europa Conference League chu play-off round aṭangin an khel thung ang.
* Atletico Madrid-in anmahni home ngeia trophy chawi an duh a, Valladolid khelmualah champion mah se nomawi pek nghal an ni lo. Nizan khan an khelmual Wanda Metropolitano Stadium-ah nomawi hi hlan an ni.

La Liga: Thil thlen dan ( May 22, 9:30 PM)
Inrinni zan La Liga inkhelh hmain Atletico Madrid leh Real Madrid-ten champion an la beisei ve ve a, zan dar 9:30-ah inkhel an ṭan.
Atletico tan champion turin chak a tawk a, Real tan Atletico-in point an hloh a, an chak bawk a ngai.
Minute 18: Real Valladolid-in Oscar Plano hmangin Atletico lakah goal an khung a, he goal luh thu hretu Real Madrid bench lam an lawm hle.
Minute 20: Real hlim chhung a rei lo. Villarreal-in Yeremi Pino hmangin an khung ve leh a, 1-0 a ni. Tihian inkhel tawp ta se, Atletico chu champion tur an ni.
Minute 26: Kieran Trippier-a ball cross chu El Yamiq-a'n an lamah a tauh let a, a goal teuh hle - an him hram.
Minute 45: First half-a tawp a, Atletico leh Real-ten hnufual zawk ni chungin chawlhlawk an hmang ve ve.
Minute 46: Chawlhlawk hman zawh a ni a, Atletico-in champion an tum tih an pholang. Marcos Llorente-a cross ṭha tak chu Suarez-a'n a tauh a, mahse, Janko chuan goal line aṭangin a lo pet chhuak hman.
Minute 55: Real Madrid-in Karim Benzema hmangin goal an khung a, 1-1 a ni chiah - Atletico an la hnufual mek avangin Real tan beiseina a vul thar.
MAHSE... vanneihnain Real lam a ṭang lo - video assistant referee hmanga ennawn a ni a, offside vangin French striker goal khung hi pawm a ni lo.
Minute 56: Zidane-a'n inthlak a ngai tih a hria a, Isco leh Rodrygo Goes-a luhtir a, Marco Asensio leh Vinicius-a la chhuak thung.
Minute 57: Second half-a nung tak Atletico Madrid tan Angel Correa chuan si phurh sutna goal-a khung ta nge nge a, Valladolid 1-1 Atletico a ni.
Minute 62: Valladolid-in Atletico thin phu an tirang - El Yamiq chuan hla deuh tak aṭangin a pet a, Jan Oblak-a dan per chu Shon Weissman chuan holam takin a hlah.
Minute 63: Simeone-a'n goal khung a mamawh tih hriain Saul Niguez leh Mario Hermoso-a la chhuak a, Joao Felix leh Renan Lodi-a luhtir.
Minute 66: Villarreal keeper Gerónimo Rulli-a'n ball a ken rei luatah a che sual a, Benzema ke bulah ball a pet - mahse, French striker hian goal ruak deuhthawah a khung lo!
Minute 67: Real-in goal khung an harsat a, Atletico erawh an phur tulh tulh thung. Sergi Guardiola pass sual zarah Suarez-a'n hun duhawm tak a ni a, Barca striker hlui hian keeper chauh hmachhawn chunga goal khung turin harsatna a nei lo.
Minute 69: Zidane-a awm hle hle thei tawh lo. Substitution pahnih a siam a, Miguel Gutierrez leh Casemiro la chhuakin Marcelo leh Mariano Diaz-a luhtir.
Minute 79: Real-in nawr an tum ṭhin a, an harsat tlat - Atletico-in hma an hruai mek tih an hria a, an phur lo niin a lang.
Minute 85: Simeone-a'n si phurh sutna goal khungtu Correa-a la chhuak a, Hector Herrera-a la chhuak thung.
Minute 87: Benzema-a'n tun season inelna hrang hranga a goal 30-na a khung a, Real-in beiseina an nei thar.
Minute 89: Valladolid-in penalty hmuh an inbeisei a, mahse, Jota tlukna hi referee-in a ho deuhah a ngai a, Valladolid leh Real lawm lohna thlenin penalty-a pe duh lo.
Minute 92: Real-in Luka Modric hmangin goal an khung leh a, 2-1 a ni. Mahse, Modric goal khung zawh rual deuhthawin Atletico leh Valladolid inkhel hun a tawp a, Atletico an CHAMPION.