Fury leh Wilder an inhnek dawn

WBC world heavyweight champion Tyson Fury chuan Anthony Joshua nen an inhnek dawn emaw tih hnuah hnek tur dang a nei a, Deontay Wilder hnek turin contract-a ziak.

Fury leh Joshua hi August 14-a inhnek turin inbe fel thawkhat tawh mah se Wilder a lo lang a, US lama Wilder leh Fury thubuai ngaihtuahtuten Fury hi Wilder hmachhawn leh phawt turin an ti.

Kum 32 mi Fury hian Wilder hi sum peka inhnukdawk mai turin an dawr zet a, an indawr fuh theih loh hnuah boxer pahnih hi a vawi thum nan an inhnek leh dawn ta zawk.

Fury chuan, "A dar, ban puam leh ke thlengin a hliam leh vek dawn a, round khat bak a daih lo ang. Wilder, nangmaha engkim kha ka thuhnuaia awm a ni e," a ti a, a cho sak sak hle.

Manchester khaw chhuak Fury leh Wilder hi December 2018 khan a vawi khat nan an intawng a, inhnehtawka puan an ni. February, 2020 khan a vawi hnih nan an intawng leh a, Fury-a'n round sarihnaah technical knockout hmangin hnehna a chang.

Boxer pahnih hi a vawi thum nan an intawng leh dawn ta a, an inhnek hun tur hi July 24 niin a hmun erawh sawichian a la awm lo a, Fury-a team lam chuan Las Vegas khawpuia mi 65,000 lenna Allegiant Stadium an hauh lawk thu an sawi.

Hetihlai hian Joshua pawh Fury nen an fight tur a tlawlh takah chuan WBO chuan Oleksandr Usyk nena inhnek turin an hriattir a, Joshua hian WBO heavyweight title bakah IBF leh WBA title-a kawl tel mek bawk.

Inrinni khan Joshua-te hi WBO chuan darkar 48 hun an pe a, Usyk hi an hmachhawn duh lo a nih chuan hetih chhunga an insawifiah hi a ngai - Joshua team-te hian vawiin thlenga an hun tiam hi pawtsei turin an ngen a, mahse, hnawl a ni.

Usyk hian Joshua vs Fury a thlen theih nan a hun ṭha chu a lo kian tawh a, mahse, a thlen dawn tak si lohah chuan Joshua hi hnek ngei a duh - boxer pahnih hi WBO chuan May 31 hmaa inremna nei turin a hriattir.