Brentford leh Swansea ten Wembley an thleng

Premier League khel tur zawnna playoff semifinal-ah Inrinni zan khan Brentford-in Bournemouth 3-1 in an hneh a, aggregate-ah 3-2 a chakin final an an lut. Semifinal inkhel dangah Swansea leh Barnsley 1-1 in an inhnehtawk a, Welsh club hi aggregate-ah 2-1 in an chak ve bawk.

Championship playoff final hi May 29, Inrinni zan dar 7:30 hian Wembley Stadium-ah a khelh a ni dawn a, Brentford leh Swansea te an inhmachhawn ang.

Brentford an tho
Brentford Community Stadium-ah first leg-a chak lo Brentford-in chak ngei tumin ṭan phat aṭangin an nawr na nghal hle.

Mualneitu hian minute ngana lekah corner an hmu a, defender chawpin an chhuak huk. Bournemouth striker Arnaut Danjuma-a'n ball per chhuak chang fuhin halfway line thlen hma aṭangin a khalh phei char char a, goal hlu tak a khung.

Bees-in tha an thah lo a, Emiliano Marcondes cross chuan Cherries defender Lloyd Kelly kut a per. Championship golden boot winner Ivan Toney a rawn pen chhuak a, cool takin penalty a khung.

Inkhel boruak sangah Bourne­mouth centre-back Chris Mepham a chesual a, ball chhuhsaktu Bryan Mbeumo chu pawththluin red card a hmu. Cherries-in player 10-in an khel zui a, aggregate-ah 2-1 in hma la hruai mah se darkar khat khelh tur a la awm avangin an him ta lo.

Second half-ah Brentford van­neihna a kaltluang a, minute 50-nah Vitaly Janelt-a'n box pawn aṭangin a pet goal a, a pet danah tih fuh a tel. Minute 81-naah Marcondes cross chu Brentford substitute Marcus Forss-a'n tlawh goal lehin mualneituin 3-1 in hnehna an chang.

Brentford head coach Thomas Frank chuan, "Darkar 24 chhung chu kan chak kan lawm thei ang. Chumi zawhah chuan playoff final atan ṭawngṭaina nen rilru zawng zawngin kan inpuahchah ang," tiin a sawi.

Swans an tlo
Swansea-in khualmualah Barnsley 1-0 in an hneh tawh a, an mual Liberty Stadium-ah pawh bul an ṭan ṭha zawk. Minute 39-naah Swans midfielder Matt Grimes-a'n keeper Bradley Collins-a hnek chhuah chu box pawnah chiah la thlain goal mawi a khung.

Playoff final lut turin Swansea dinhmun ṭha mah se minute 71-naah Cauley Woodrow hmangin Barnsley-in siphurh a sut. Hun tawp lam inkhel boruak a nun phah sawt. Swans substitute Korey Smith-a'n keeper chiah ah hmachhawn hnuah a tlu a, goal dang a luh belh lo.

Swansea manager Steve Cooper chuan, "In ka thlen velah Laptop aṭangin kan khingpui Brentford khelh dan ka en nghal ang," tiin final atana inpuahchah nghal a tum thu a sawi. Cooper chuan sawi chhunzawmin, "Kan hnathawh hi a ropui a, ka thlen chin hi ka chhuang. Amaherawhchu hna kan la zo lo a, kar khat chhung inpuahchahna hun kan nei," tiin a sawi.