French Open khel lo tur Halep

Hmeichhe tennis world number 3 Simona Halep chuan a chawn hliam vangin French Open a khel thei dawn lo. Romanian star hian Paris khawpuia clay court inelna lian a khelh theih loh tur thu hi a ti chiang tawh.

Kum 29 mi Halep hi clay court-a inkhel thiam bik a ni, mahse Italian Open an khelh laiin a inhliam a, a hliam hi a dam mai theih loh avangin May 30 aṭanga khelh tur inelna lian atan a inpeih hman dawn lo tihna a ni.

French Open 2018 champion Halep chuan, "Hliam vanga Grand Slam khelh theih loh chu thil hrehawm tak a ni dawn, rilrua kan lo ruahman leh khelh châk em em aṭanga inhnuhdawh a ngai chu a hrehawm takzet," a ti.

Tun dinhmunah hian world number 1 Ashleigh Barty pawh hliam vangin a chawl mek. Australian star hi Halep ang bawkin Rome khawpuia tournament an khelhah khan a inhliam a, Roland-Garros a khel ngei dawn em tih a la chiang bik lo.