Ranieri a chhuak dawn

Claudio Ranieri chuan tun season tawp rualin Sampdoria a chhuahsan tur thu a sawi. Inrinni zana Parma 3-0 a an luhchhuah kha Sampdoria a enkawl chhunga a match hnuhung ber a ni ta tihna a ni.

Leicester City a enkawl laia Premier League nomawi chawi tawh Ranieri hian 2019 October thla khan Sampdoria a enkawl ṭan a, team a enkawl tirh hian table mawngphah luahtu ni mah se season a tawp meuh chuan 15-na dinhmun an luah.

Tun season-ah pawh an che chhe lo, match 38 aṭangin point 52 an hmu a, pakuana dinhmun an luah. Nizan khan an hnuaia awm Hellas Verona an inlan a, anni hi chak mah se an chunga awm hi an umphak thei tawh lo.

Italian manager Ranieri chuan, "Team hnenah ka chhuah tur thu ka sawifel tawh, season tharah chuan he hmunah hian ka awm tawh lo ang. Hripui leng karah pawh hun harsa kan paltlang thei a, tihtak zeta khel player ka enkawl thei hi ka lawm," a ti.