Copa America hma hun a chiang lo

June 13 aṭanga khelh tur Copa America 2011 chu dinhmun chiang lo takah a ding mek. Inelna thleng tur pakhat zawk Colombia chuan kumin atan an thlen theih loh tur thu an ti chiang tawh, ram pakhat zawk Argentina pawh an dinhmun a chiang lo.

Colombia ramah hrileng a hluar leh mek a, hei vang hian ram mipui chuan tournament thlen loh mai an duh. South America rama football thuneitu sang CONMEBOL chuan Colombia-in an thlen loh tur chungchang hi a pawm tawh.

Kar hmasa khan Argentina ram president Alberto Fernandez chuan inkhel zawng zawng chu an rama thlen an huam thu a sawi. Mahse, Argentina football association (AFA) chuan tun dinhmunah an rama football match zawng zawng chu hrileng vangin a ti tawp lailawk mek.

Argentina ramah hian Inrinni aṭang khan inkharkhip an kalpui leh mek a, inkharkhip hian ni kua a awh ang. Beisei anga hrileng a ziaawm thei a nih chuan Copa America thlen hram chu an la tum niin a lang.

AFA chuan thuchhuah siamin, "Ram chhunga inkharkhipna kalpui a nih avangin May 30 thleng chu inkhel engmah a awm thei lo ang. Hriselna lama mithiamte ngaihdan kan ngaichang a, anni thurawn la chungin kan kalzel dan tur pawh ngaihtuah a ni ang," an ti.