Nuno-a'n Wolves chhuahsan dawn

Nuno Espirito Santo chuan a club enkawl lai Wolverhampton Wanderers chu tun season tawp rual hian a chhuahsan dawn. Nuno leh Premier League club hi inhriatthiam tawnna a inṭhen tur an ni.

Kum 47 mi Nuno hian 2017 khan Porto chhuahsanin Wolves hi a enkawl ṭan. English team a enkawl hmasak ber season-ah hian Championship title an la a, inelna sang EPL khel turin an inhlangkai nghal bawk.

Premier League-ah pawh team hmuhnawm zingah an tel phak - tun hnai season hnih chhung chu pasarihna ni chungin kum an khar. Nikum September thla mai khan 2023 thleng cham turin contract a ziak thar.

Portuguese manager Nuno chuan, "Kan thil tum kan thleng tawh, tihtakzetna nen hun rei tak chhung kan beiho tawh a, tunah chuan a tawpna hun tur chu a lo thleng dawn ta, thawnthu ngaihnawm leh ka hriatreng tawh tur chu a ni ang.

"Compton training ground ka thlen hmasak ber aṭang khan kan thil tum tih hlawhtlin tumin theihtawp kan chhuah. Kan hnathawh leh thil tawn zawng zawngte kha ka chhuang hle," tiin a sawi. Nizana Manchester United nen an inkhelh kha Wolves manager a nih chhunga a match hnuhnung ber a ni ta.

Nuno leh agent Jorge Mendes kaihhruaina hnuaiah Wolves hian Portuguese player ṭha tak tak - Joao Moutinho, Diogo Jota, Ruben Neves leh Fabio Silva te an lalut a, football hmuhnawm an chhawp chhuak ṭhin - an neih ṭhat ṭhenkhat erawh chelh reng theih an ni lo.

League match hnuhnung ber an khelh hmain Wolves hian point 45 hmuin 12-na an ni a, an chunga awm Aston Villa chu umphak theih an ni tawh lo.

Wolves chairman Jeff Shi chuan, "Nuno hian Wolves tana theihnghilh theih tawh loh tur thil tam tak a ti a, hriatreng a ni tawh ang. Mahse tunah chuan kan tawpna ni chu a lo thleng dawn ta si. Tun hnai kum li chhunga a hnathawh avang hian keini chuan lawmthu kan sawi tak meuh," a ti.