Rawlthar duhawm Gauff tan nomawi

Coco Gauff chuan tennis inelna huangah nomawi pahnih a chawi ta. American tleirawl duhawm hian Inrinni zan khan Wang Qiang lakah 6-1, 6-3 a hnehna changin Emilia-Romagna Open nomawi a chawi.

Seeded pathumna Gauff hian hnehna chang turin darkar khat leh minute 14 chauh hun a mamawh, kum 17 mi chauh la ni mah se amah aia kum 12 zeta tennis khel hma zawk Wang lakah harsatna a tawk lo.

Set khatna an khelh laiin Gauff hian 5-1 in hma a hruai a, hetih lai hian a khingpui Chinese nula hian break point vawi hnih hmu mah se Gauff a inchhanhim thei ve ve, set hnihnaah pawh a khingpui service chhuhsak lehin buaina a tawk lo tiin a sawi theih.

Kum 2019 khan Linz Open-ah Gauff hi a lo champion tawh a, khatih lai khan kum 15 mi chauh a la ni, nomawi a chawi hmasak hian French Open champion Jelena Ostapenko a hneh, a hnuah erawh nomawi chawi chhunzawm mai a harsa.

World number 30 Gauff hi tun kara ranking chhuak tharah chuan 25-na a ni phak dawn a, tun thla tawpa khelh tur French Open atan seeded a ni phak dawn tihna a ni - American player dangte ang lo takin clay court hi atan hmun ṭha a ni dawn niin a lang.