Premier League transfer tawp ni sum sen a tlem!

Inrinni zing dar 4:30 khan Premier League thlasik transfer khar a ni a, transfer tawp nia sum sen tlem ber ṭum an tawng - pound maktaduai 25 bak thehchhuah a ni lo!

Sum sen a tlem miau avangin mipui 'ṭhawng dawt' thei khawpa transfer lian tham a thleng lo a, Odion Ighalo-a'n Shanghai Shenhua aṭanga Manchester United a pan chu transfer tawp nia thleng langsar bera chhal ngam a ni. 

Mahse, Watford striker hlui hian loan-in Red Devils hi a zawm avangin loan fee pound maktaduai thum bak sum che a awm lo a, West Ham-in pound maktaduai 18-a Hull City forward Jarrod Bowen an lakluh chu transfer tawp nia player manto ber a ni.

Premier League club ten January transfer-a an sum sen zat belhkhawm erawh pound maktaduai 230 a tling a, thlasik transfer-a Premier League club-ten sum an sen hnem ber dawt a ni thung. 

Hammers-in kum nga leh a chanve atana Bowen an lakluh tih lohah chuan pound maktaduai 4.5 man Tariq Lamptey-a'n Chelsea aṭanga Brighton a pan chu transfer tawp nia sum sen natna a ni. 

Aston Villa-in Swansea City striker Borja Baston chu free transfer-in an lalut a, Leicester City chuan tun transfer-a an player lak awmchhun ni turin Wolves defender Ryan Bennett chu loan-in an la bawk. 

Sheffield United-in Dutch forward Richairo Zivkovic leh Greece defender Panagiotis Retsos te chu loan-in an lalut a, Norwich-in pound maktaduai thuma Coventry defender Sam McCallum an lei leh Wolves-in pound maktaduai khata Rochdale defender Luke Matheson an lei te chu an club khelhnaah loan-in an kir lehnghal thung.

 

Manchester United chuan Southend United goalkeeper Nathan Bishop chu development squad atan a man puanzar lohin an lalut a, Chelsea, Manchester City leh Bournemouth ten January-ah players lakluh an nei lo. 

Kum 2015 khan Watford chu Premier League khel turin an inpet tling a, hetihlaia an striker pawimawh chu league match 35-a goal 20 khungtu Odion Ighalo a ni. 

Ighalo hian Watford tan 2015-16 Premier League khelin match 37-ah goal 15 a khung thei a, mahse 2016-17 season khan match 18-ah goal 1 lek khungin Chinese Super League lamah a kal. 

CSL-a kal hnuin hlawhtlinnain a um zui a, Barcelona hialin sawm mah se a chhuak duh lo. Mahse, January-ah Marcus Rashford inhliam vanga striker mamawh United an lo lang a, a club ṭan em em sawmna a hnar phal lo. 

Ighalo hian season tawp thleng loan-in a khel dawn a, contract-ah hian tun laia loan contract-a lar tak angin a tawpa a ngheta lei theihna ziah tel a ni lo thung. 

Transfer tawp ni ni lo, January transfer hrim hrima player manto ber chu  Bruno Fernandes a ni a, Sporting Lisbon midfielder manah hian United chuan pound maktaduai 47 an seng a, pound maktaduai 67.7 thlenga sang chho thei tur a ni. 

Real Betis midfielder Giovani Lo Celso chu Tottenham Hotspur-ah loan-in khel sa mah se London club hian pound maktaduai 27.2-in a nghetin an lalut a, pound maktaduai 27 man Steven Bergwijn chu PSV Eindhoven aṭangin loan-in an lalut bawk. 

Wolves-in Portuguese winger Daniel Podence lalut turin pound maktaduai 16.9 an seng a,  Sheffield United chuan an club record ni turin Genk midfielder Sander Berge chu pound maktaduai 22-in an lalut. 

Premier League aṭanga player chhuak langsar bera chhal ngam chu Christian Eriksen a ni a, Inter Milan chuan Spurs midfielder hi pound maktaduai 16.9-in an lei.

Premier League club ten nipui leh thlasik transfer-a sum an sen zat belhkhawm chu pound tluklehdingawn 1.6 a tling a, 2017-18 season-a pound tluklehdingawn 1.9 sen a nih hnuah sen hnem ber ṭum a ni. 

January bika an sen pound maktaduai 230 pawh hian 2017-18 season thlasik transfer-a sen pound maktaduai 430 chiah a phak lo a, January-a player lakluh nana sum sen 52% hi 'Big Six' te sen a ni. 

Player leina man zat aṭanga  player hralhna paih leh hnua Premier League club ten January-a sum an sen hi pound maktaduai 165 a ni a, January bik atan hei hi record a tling. 

Hetihrual hian transfer tawp nia Premier League club-te insen dan thlirin an insum ve ṭan ta niin a lang a, a bik takin January transfer-in nghawng a neih tlem dan ngaihtuahin an ip deuh pawh a ni thei.