Man City-in mipui sing khat hmaah nomawi an chawi : A tàwp dan pawh 'Agueroooo!'

Argentine striker Sergio Aguero-a'n Manchester City kawr haa Etihad Stadium-a a inlan hnuhnun berah goal hnih a khung a, Pep Guardiola hoten Everton 5-0 a sawpin Premier League season an khar.

Man City an champion chian tawh avangin mipui mit fukna chu Aguero a ni a, kum 32 mi striker hian minute 25 chhung lekin 'mi bik' a nih zia a pholang a, Citizen tan chuan mittui nena thlah liam mai loh chu tih theih dang a awm lo.

5 Star City
Man City hi tun hnai kum 10 chhungin league-ah vawi nga an champion a, season hnuhnung paliah vawi thum nomawi an chawi. An record thlir hian an thiam tih a chiang reng tawh a, Everton hmaah an lantir leh bawk.

Pep Guardiola-a'n Champions League final thlir chungin player ṭha nen bul an ṭan a, Chelsea an hmachhawn hunah pawh pathum vel bak an thlak danglam tawh kher lo ang.

Amaherawhchu Kevin De Bruyne pass sual vangin Dominic Calvert-Lewin-a'n goal khung theihna hun ṭha a nei a, English striker goal khung tur hi keeper Ederson-a'n a dansak.

Belgian midfielder KDB-a'n a tihsual thup nan mawi fahranin minute 11-naah a hlai goal a, minute 14-naah Gabriel Jesus-a'n goal mawi khung leh bawkin Man City dinhmun ṭha nghal hle.

City defender chhuanvawr Ruben Dias-a'n Richarlison a tih tluk avangin penalty a chawi a, Toffees tana Gylfi Sygurdsson-a'n petin Ederson-a'n a dansak. Brazilian keeper hian UCL final atan inrintawkna a ngah sawt ang.

Second half-ah City fa chuam Phil Foden-a'n ṭha zetin minute 53-naah a pet goal a, 3-0 a nih tak avangin Premier League champion-in chakin season an khar dawn ti chiang tawh.

Agueroooo
Etihad Stadium-a entu an awm hnuhnun ber aṭanga ni 459 hnuah mipui sing khat an pungkhawm a, inkhel leh nomawi chawi thlir tura pungkhawm ni bawk mah se Aguero thlah tura kal khawm tih pawhin a sawi theih.

Aguero hi kum 2012-a Man City champion-na goal khungtu a nih miau avangin City ṭantute thinlungah a lian hle. Everton nen hian Pep Guardiola-a'n Argentine forward hi bench-ah a dah a, mahse inkhelh hmain a khelhpuiten 'Guard of Honour' an pe a, mipui thawm a ṭha hle.

Minute 65-naah Aguero-a'n Riyad Mahrez a rawn thlak a, kum kua liam taa Martin Tyler-a'n "Agueroooo" tih ri chu bengah a rawn ri thar. Argentine striker-a'n amah ngainatute tih lawm ṭhin dan pangngaiin goal class a rawn khung deuh nghal a, 'Agueroooo' tih hriat tur a awm nghal.

Aguero hian minute 71-naah Fernandinho hnen aṭanga a ball hmuh chu a ke dinglamin 'cool' takin a khung a, goal dang hmu turin hun rei nghah a ngai lo. Minute 76-naah Fernandinho cross chu Aguero-a'n a tauh lut a, keeper Jordan Pickford a che lo.

Raheem Sterling leh Gabriel Jesus ten Argentine striker hi duhsak hlek se, hattrick siam thei a ni a, mahse Etihad Stadium-a match hnuhnung berah duhsak a hlawh tawk lo. Heti chung hian Aguero hian chance vawi hnih a la nei leh tho a, 'Agueroooo!' tiha bul ṭantu khan 'Agueroooo!' tih bawkin a hun tawp a khar.

Nomawi a hlu
Man City manager Pep Guardiola chuan, "League nomawi hrim hrim hi a hlu vek a, kumin hi Covid-19 buaina kara champion kan nih avangin a hlu lehzual. Champions League final atana inpuahchah turin hun kan nei a, chuvangin kan champion hi kan lawm phawt ang. Ni khat kan awm hahdam anga final atan kan inbuatsaih ang," tiin a sawi.

Man City champion ropuina deuh chu goal khungtu bik an nei lo a, player hrang 16-in league bikah goal an khung. Pep Guardiola-a'n striker tel loin harsatna a tawk lo a, tun season-a goal khung tam ber Ilkay Gundogan pawh midfielder niin goal 13 a khung.

Pep Guardiola hoten Premier League nomawi an chawi ta a, an duh ber Champions League nomawi chawi tur erawhin May 29, Inrinni zanah Chelsea an hneh a ṭul dawn a ni.

A thlakna an awm thei lo - Guardiola
Manchester City boss Pep Guardiola chuan inkhelh banah mittui tla chungin Sergio Aguero thlahna thu a sawi. City manager Pep chuan, "Aguero thlakna an awm thei lo, thil theih a ni lo. Player danglam bik a ni a, kan ngaina hle," tiin a fak.

Sergio Aguero-a'n Everton lakah goal hnih a khung zarah Wayne Rooney record khumin record thar a siam a, kum 10 chhungin Manchester City tan league-ah goal 188 khungin Premier League-a club khat tana goal khung tam ber a ni. Rooney khan Manchester United tan goal 183 a khung.

Aguero chuan, "Min thlawp tlat ṭhin avangin Man City fan-te chungah ka lawm e. Fan-ten hmangaihna an lantir chuan hna a awlsam phah ṭhin. Ka chet chhiat ṭum pawhin ka hnungah an ding tlat a, ka lawm hle," tiin fan-te chungah lawmthu a sawi.

City manager Pep Guardiola chuan, "Thuruk tlem kan sawi ang e. Aguero hi ka club hmangaih Barcelona nen inremna an nei hnai. Khawvela footballer piang tawha ṭha ber Messi nen an khel dun dawn a, nuam a tih ngei pawh ka beisei. Nuam a tih ka ring a, Barcelona pawh an ṭhat phah sawt ang," tiin Aguero-a'n Barcelona a pan tur thu a sawi.