Champions League khel tur a chiang ta Liverpool an chak, Chelsea 'hero' Bale

Premier League season a tawp a, a tawpah chuan club lian pali bawk chu Champions League khel tur an ni. Liverpool leh Chelsea-ten Manchester City leh Manchester United hnungzuiin season tharah European football-a club inelna sang ber hi an khel dawn.

Liverpool-in season thara Champions League khel turin chak an mamawh a, an mamawh ang ngeiin an chak - an mikhual, Roy Hodgson hnuaia an match hnuhnung ber khel Crystal Palace chu 2-0 in an hneh a, Sadio Mane chuan goal hnih a khung.

Chelsea-in Liverpool ang thoin chak an mamawh a, mahse, an mikhualna ramah Aston Villa chu 2-1 in an ngam lo. Villa tan Bertrand Traore leh Anwar El Ghazi (penalty) ten goal khat ve ve an khung a, Blues tana Ben Chilwell-a goal khungin awmzia a nei lo.

Leicester City-in Tottenham Hotspur lakah hnehna chang se top four-ah Chelsea tlanpelin season an khar ang - mahse, Blues an vannei a, Foxes-in 2-1 a hma an hruai reng hnuin Gareth Bale chuan goal hnih a rawn khung a, 4-2 in Spurs a chakpui daih!

Team talbuai Liverpool
Liverpool-in season duhawm lo tak an hmang a, hliamin a tlakbuak nasat avangin chhuanlam tur pawh an nei ṭha - an thiampuipa Virgil van Dijk chuan hliam vangin season tluan (33 games) deuhthaw a khel lo!

Dutch defender bakah hian defender Joe Gomez (31), Joel Matip (28), Naby Keita (28), captain Jordan Henderson (17), Diogo Jota (19), Thiago Alcantara (14) leh Fabinho (8) ten match engemaw zat an khel thei lo bawk a, chhiatpui tham a ni.

April 24 khan Reds hian minute 95-naa goal an chhuah avangin Newcastle United chu an inhnehtawkpui a, table-ah parukna an ni - Liverpool fans tan season thara Champions League khelh beiseina a tlem hle.

Mahse, Liverpool an vannei - an elpui Leicester an chesual zauh zauh a, Magpies hnua match nga an khelhah an chak vek bawk. West Brom laka injury time-a keeper Alisson-a goal khungte kha, vanneihnain an lam a ṭang tih loh rual a ni lo.

A tawpah a changtupa
Baggies laka Alisson goal khung khan Reds tan point a hlawhchhuahpui a ni mai lo a, beiseina thar a siam tel a, chu chu Liverpool tana an keeper goal khung hlutna a ni.

Khualmualah Burnley chu 3-0 in an sawp zui a, Pathianni zanah chak mamawh tih inhre chungin Palace chu 2-0 in an hneh leh bawk. Mane-a'n goal hnih a khung a, top scorer ni tura Harry Kane nena inel Mohamed Salah erawh a vanneih zan a ni lo.

Reds-in goal an khung hma hian Foxes-in Spurs lakah 1-0 in hma an hruai a, Villa leh Chelsea chu 0-0 in an inhnehtawk mek bawk - heti hian inkhel tawp ta se Liverpool hian Champions League an khel dawn lo tihna a ni a, mahse, 'a tawpah a changtupa' tih angin Liverpool-in goal hnih an khung a, Champions League an khel dawn.

Liverpool tan a contract hmang zo Georginio Wijnaldum chuan a match tawp ber a khel a, Barcelona nen sawizawm a ni - Reds tan Premier League, Champions League, UEFA Super Cup leh FIFA Club World Cup-ah a champion.

Chelsea an hlauthawng
FA Cup final-a chak lo hlim Chelsea-in season thara Champions League khel turin chak an mamawh a, mahse, minute 52 chhungin goal hnih an chhuah hman!

Villa Park-a 2-0 a Chelsea an hnufual lai hian Liverpool-in Palace lakah 1-0 in hma an hruai mek a, Leicester City-in Jamie Vardy-a penalty pahnih hmangin Spurs lakah 2-1 in hma an hruai bawk.

Hetihlai hian inkhel tawp ta se Tuchel-a hnuaia pawr thar tak Chelsea-in top four-ah season an khar dawn lo tihna a ni a, Champions League final-a City hneh chu an tan season thara Champions League khelhna kawng awmchhun a ni ang.

Mahse, Spurs-in an hmelma Chelsea an hnual laiin hna an thawhsak a, minute 76-naah an goal hnihna an khung - corner aṭanga ball kal chu Kasper Schmeichel chuan an lamah a hnek lut a, 2-2 a ni.

Chelsea 'hero' Bale
Foxes leh Spurs 2-2 a an inhnehtawk lai hian Liverpool-in 2-0 in Palace lakah hma an hruai a, Anfield-a mipui 10,000 hmaa inkhel an nih bawk avangin an tlawm 'thut' a rinawm tawh lo.

Hetihlai hian Chelsea tan Ben Chilwell chuan goal khat a khung ve a, 2-1 a la ni cheu. Foxes an la in draw mek bawk a, goal difference hmangin palinaah Chelsea an la awm - an dinhmun a derthawng takzet.

Mahse, Chelsea lawmna turin Spurs tan Bale-a rawn inlar a, Welsh forward hian minute 87-naah Spurs hmahruaina goal-a rawn khung. Bale-a goal khung hnu lawkah Blues captain Cesar Azpilicueta chu Jack Grealish laka a foul avangin hnawhchhuah a ni. Mahse, Bale bawk a inlar leh a, Chelsea hlauhthawnna bengdai turin a goal hnihna a khung a, 4-2 in Spurs an chak.

Champions League khelh tum team pathumte inkhel a rual deuhthawin a tawp - Liverpool chiah an chak a, Chelsea chak lo ve tho mah se Spurs-in hna an thawhsak a, Foxes chu a vanduai ber an ni ta. Tottenham hian season tharah inelna thar Europa Conference League an khel ang.

Tawp kharna duhawm tak a ni. Kar nga, ruk, riat liam ta velah khan pathumnaah season kan khar tur thu hi min hrilh ta se, kan ban phak loha awm a ni a, awih a harsa ang. Mahse, heng zawng zawng bei chunga pathumna kan ni thei hi hringnuna zirlai duhawm ber a ni. Kar nga chhung leka engmah lo mai aṭanga Champions League kan inpetkai thei hi hnathawh ropui tak a ni. - Jurgen Klopp, Liverpool manager

Team ka kaihhruaina hnuhnung ber chu a thleng ta a, football hmun ropui zinga mi Anfield-ah ngei ka match tawp ber kan khel hi ka lawm takzet a ni. Premier League khelh phak hlutna chu Old Trafford leh Anfield-a inkhelh theih hi a ni a, keini aia team ṭha zawk kan tum tih lohah chuan Anfield-a ka hun hnuhnung ka hmang hi ka hlim hle. - Roy Hodgson, Crystal Palace manager

Minute thum emaw li vela kan inkhel a tawp hma khan Leicester an chak loh thu ka hria a, Champions League kan khel dawn tih ka chiang tawh. Villa laka chance insiam a harsa a, mahse, zaninah erawh chance kan ngah hle. - Thomas Tuchel, Chelsea boss

Leicester-a hna ka thawh ṭantirh khan mid-table club kan ni a, mahse, kum hnih vel lek hnuah club liante nena inelin a vawi khat nan FA Cup kan champion a ni. Team liante anga sum nei ve lo chungin kawng dik kan zawh mek zel. - Brendan Rodgers, Leicester City coach

Hei aia sang zawka season khar kan duh tih hi zep tur a awm lo. Champions League kan khel lo tur hi hrehawm kan ti a, mahse, European football-a eng inelna pawh hi kan zah em em. Season tharah hei aia ṭha zawkin kan lo kir leh ang. - Ryan Mason, Spurs manager lailawk