Spain : Ramos - Out; Laporte - In

Euro 2020 khel tur Spain-in squad an puang a, Real Madrid captain leh centre back Sergio Ramos chu player 24 zingah a tel lo!

Spain coach Luis Enrique-a'n Covid-19 vangin player 26 koh theih ni mah se player 24 koh a thlang a, Manchester City defender Aymeric Laporte chu a vawi khat nan koh a ni thung.

Real Madrid-in Barcelona boss hlui Enrique-a lung a len lo a, Spanish coach hian a squad-ah Real Madrid player pakhatmah a telh lo. Khawvela goalkeeper man to ber Kepa Arrizabalaga a ko tel lo bawk.

Mangṭha Ramos
Kum 35 mi Ramos kum a tam ve deuh tawh a, tun season-ah pawh hliamin a tlak buak ve reng bawk avangin inelna hrang hrangah match 21 chiah a khel a, March thla tawp hnuah match khat bak a khel lo.

Enrique-a'n Ramos-a inkhelh tam lohzia a hai lo a, Spain tan inlan tura koh chiah a ngai lo - ram tan match 180 khela goal 23 khung thei defender tel loin Spain-in Euro an hmachhawn dawn. Barcelona boss hluiin Ramos-a mangṭha laiin Laporte-a ko thung a, France-in an koh duh loh avanga May 2021-a Spain khua leh tui nihna neia Spain tana inlan thlangtu hi tam takin Ramos koh loh chhanah an ngai.

Mahse, Enrique chuan, "Ramos ka koh loh chhan hi midang ka koh nen chawhpawlh suh u. Ramos hi kan zinga tel turin ka duh a, dam hman se ka duh em em zawk a ni," a ti a, a defender chu a inhliam vanga ko lo a nih thu a sawi.

Hello Laporte
Kum 26 mi Laporte hian age level-ah France tan a khel ṭhin a, Athletic Bilbao aṭanga Manchester City-a zawm hnuah lar zual mah se France coach Didier Deschamps lung a dum ngang lo a, ram tan senior level-ah a la inlan miah lo!

Royal Spanish Football Federation (RFEF) chuan Laporte hi an ram tana inlan tura an duh avangin an ram khua leh tui nihna a neih theih dan tur an buaipui a, Spanish Council of Ministers-ah dilna an thlensak. May thla khan Laporte-a dilna hi pawm a ni a, football khawvela thuneitu sang ber FIFA chuan Laporte-a'n Spain tana inlan a tumna hi an phalsak bawk.

City tana tun season inelna hrang hranga match 27 kheltu Laporte bakah hian English club-a a khelhpui Eric Garcia chu koh a ni bawk a, Ramos koh a nih laia tun season-a match 12 chiah la khel Garcia koh a nih hian sawisel a hlawh khawp ang.

Real an awl
Enrique-a'n a squad-ah Real Madrid player a telh miah lo! Right back Dani Carvajal koh loh a nih chhan hi a inhliam vang a nih a rinawm a, player dang erawh an dam ṭha.

Spain tana match 22 khel tawh Nacho, Real tana season duhawm tak hmangtu Marco Asensio, Spain tana vawi kua inlan tawh Lucas Vázquez, ram tana vawi li inlan tawh Álvaro Odriozola leh Spain tana vawi 38 inlana goal 12 khung thei Isco-te chu koh zingah an tel lo.

Hetihrual hian Nacho leh Asensio-ten season pangngai tak an hmang tih loh chu Real player dang hian tun season-ah sawi vul tur an nei lo a, koh an ni lo hi tam takin an dem hran lo ang.

Asensio erawh Real tan season duhawm tak hmangin match 48 ngawt a khel a, goal sarih khungin assist vawi hnih a nei - vui pui theih tak tur a ni.

Spain Squad - Player 26 koh theih aṭangin player 24 an ko
Goalkeepers: David de Gea (Manchester United), Unai Simón (Athletic), Robert Sánchez (Brighton & Hove Albion)
Defenders: José Gayà (Valencia), Jordi Alba (Barcelona), Pau Torres (Villarreal), Aymeric Laporte (Manchester City), Eric García (Manchester City), Diego Llorente (Leeds United), César Azpilicueta (Chelsea), Marcos Llorente (Atlético)
Midfielders: Sergio Busquets (Barcelona), Rodri Hernández (Manchester City), Pedri (Barcelona), Thiago Alcántara (Liverpool), Koke (Atlético), Fabián Ruiz (Napoli)
Forwards: Dani Olmo (Leipzig), Mikel Oyarzabal (Real Sociedad), Gerard Moreno (Villarreal), Álvaro Morata (Juventus), Ferran Torres (Manchester City), Adama Traoré (Wolves), Pablo Sarabia (Paris)