Hammers-in Europa League khel dawn

West Ham-in season thara European football khel turin Southampton laka point khat hlawhchhuah an mamawh a, Pathianni zan khan an mikhual hi 3-0 in an hneh.

Hammers tan Pablo Fornals chuan goal hnih a khung a, midfielder ṭhangduang Declan Rice chuan goal khat a khung ve bawk - hun tawp thlenga goal dang lut loin West Ham an chak.

David Moyes-a team-in hnehna an chan avangin table-ah parukna dinhmun luahin season an khar a, kum 22 chhunga English top flight league-a season an khar ṭhat ber ṭum a ni.

Hammers hi thla hmasa thleng khan Champions League khel thei dinhmunah an ding zawk a, point thum leka top four phak lo chungin season an khar ta zawk.

Thla sawm liam ta lawka relegation 'fight' tu Hammers tana Moyes-a hnathawh hi fak loh chi a ni lo a, December 2019-a he team zawmtu coach hian London club-ah hian kum thum dang cham turin contract thar a ziak dawn niin khawthlang media-te chuan an tarlang.

Hetihrual hian Hammers tan nipui transfer-ah thil a awlsam dawn lo - an midfielder chhuanvawr Rice chu European club liante awh rawn a ni a, Manchester United aṭanga loan-a an hawh Jesse Lingard dinhmun a la sawichian theih loh bawk.

Czech Republic international pahnih Vladimír Coufal leh Tomas Soucek-ten season an hman dan enin dawrtu an nei ang tih a chiang bawk a, Moyes-a tan a player ṭhate chelh an harsa dawn.