Lyon-ah Tsitsipas a champion

Pathianni zan khan Lyon Open chu khelh zawh niin, rawlthar Stefanos Tsitsipas-a'n a khingpui Cameron Norrie chu 6-3, 6-3 a hnehin a champion. Greek player hian tun season chhunga nomawi pahnih a chawina a ni nghal bawk.

Tsitsipas hian inelna a hmang ṭha hle, nomawi a chawi thleng hian set khat chiah a hloh. Thla hmasa khan clay court inelna dang Monte Carlo Masters title chu a lo la tawh bawk a ni.

Seeded pakhatna Tsitsipas chuan, "Thil engkim mai kha ka tan a ṭha zawngin a kal vek. Tun hnaia ka khelh ṭhat avangin beiseina sang tak nen Paris khawpui ka pan thei ang," tiin a sawi.

Tun thla tawp hian clay court inelna lian French Open khelh a ni dawn a, inelna neih hmain Tsitsipas hian tournament dang a khel tawh lo ang.