A chung berah Verstappen

A hmasa ber aṭanga tlan ṭan tur Charles Leclerc a inlan thei lo a, champion lai Lewis Hamilton pawh qualifier lamah a che ṭha tawk lo. Max Verstappen-a'n a hun ṭha neih a bawhpelh lo; Monaco GP-ah hnehna changin championship hmahruaitu a ni nghal bawk.

Ferrari driver Leclerc hi khawl lam chiang lo vanga inlan thei lo a ni a, a tir aṭanga hmahruaitu Verstappen hian harsatna lian lutuk tawk loin hnehna a chang, kuminah vawi hnih a chakna a ni - a chak loh ṭum pawhin pahnihna a la ni vek.

Champinship hmahruaitu Max chuan, "Ka naupan lai khan Monaco GP hi a hmunah kan en a, intlanisak zinga tel ve kha ka chak takzet. Tunah chuan duhthusam kha a takin a rawn thleng dik ta," tiin a sawi.

Vawi sarih champion tawh Hamilton chu pasarihnaah a thleng. Mercedes driver leh Max inkarah point khat chauh a awm a, tun season chu driver ṭha pahnih hi na takin an inel chhunzawm dawn tih a chiang.