PSG rorelna titawptu Lille

Lille chuan Paris St-Germain vawk lal lenna hmunah hlawhtlinna an chang. French Ligue 1 champion chu Lille an ni, manager Christophe Galtier kaihhruai team hian tun hnai season riat chhunga vawi sarih champion thei Paris club khumin nomawi an chawi.

Pathianni zan khan Ligue 1 season kal lai chu a hmawr bawk a ni a, hmahruaitu Lille hian an mikhualna ramah Angers 2-1 in an hneh - anmahni hnaih bertu PSG pawh Brest mualah 2-0 in an chak ve bawk, table erawh a inthlak danglam phah ta lo.

Champion Lille leh PSG bakah AS Monaco ten season tharah Champions League an khel dawn. Palina Lyon chu Europa League lamah an inlan ang a, pangana leh parukna Marseille leh Rennes ten Europa Conference League an khel ang.

Rinkai lo kha
Season tir kha chhut kir ila, champion turin Lille hi rinhlawh an ni lo. Mahse, a tawpah erawh a chungnung ber an ni miau si, a vawi li nan Ligue 1 title an la a, an champion hnuhnung chu 2010-11 daih tawh kha niin, hetih lai hian Eden Hazard leh Gervinho te an nei.

Lille hian Arsenal hnenah Nicolas Pepe leh defender Gabriel te chu man tam takin an hralh a, tun ṭuma tlarhma lama an rinrawl erawh Jonathan David leh Burak Yılmaz te an ni a, anni pahnih hian an league match hnuhnung berah pawh goal an khung.

Angers lakah hian an defender pawimawh leh captain ni bawk Jose Fonte chu hrem vangin an chhawr thei lo a, mahse hun tawp dawna goal khat an chhuah bak chu buaina leh harsatna lian tham an tawk lo - an mamawh zat point an hmu.

Lille in phu e
Season hman zawh takah Lille khan boruak hrang hrang an tawng, club neitu leh chairman an chhuak a, sporting director Luis Campos a chhuak bawk - club thuneitu insiksawi vel karah pawh coach Galtier chuan a hna tlin takin a thawk.

An elpui - PSG, Lyon leh Monaco lakah an tlawm miah lo a, a bik takin season tawp dawna PSG nen point inang an neih laiin Paris club hi an hneh thei. Hun pawimawh lai taka an elpui an hneh hi an champion theih chhan pawimawh a ni.

Tlarhnungah Fonte (kum 37) leh Sven Botman (21) ten hna an thawk ṭha a, midfielder Benjamin Andre (30), Boubakary Soumare (22) leh Renato Sanches (23) te an inkawp rem; match hnuhnung pangaa goal ruk khungtu Yilmaz pawimawhna a sang bawk.

PSG ve thung
Champions League final thlen puitu Thomas Tuchel banin Mauricio Pochettino an lalut a, Argentine manager hian Super Cup leh French Cup lakpui mah se Ligue 1 leh UCL-ah erawh an hlawhchham.

Season bul an ṭan fuh loh vangin PSG dinhmun a ṭha lo, chutih rualin Poch-a'n a kaihhruai chinah league match bikah pawh vawi li ngawt an tlawm, heng zingah hian anmahni mualah ngei vawi thum an chak loh a tel - PSG tan chuan sulhnu chhe tak a tling.

Club neitu lamin Ligue 1 chauh an duhtawk lo a, inelna lian UCL an duh avangin manager an thlak kual fo. Tunah erawh Pochettino hnuaiah an nomawi kawlsa pawh an hloh ṭhen a, an tum leh beisei ang hlawhtlinna chu an la chang thei rih lo.

A chhan chu?
Nomawi la chawi ngai lo Pochettino tan PSG enkawl hmasa bera title pahnih lak hi manager a nih hnua a hlawhtlinna lian chu a ni. Mahse, Argentine manager hian hmasawnna tur a la ngah, boruak san vanglai taka dingchang zawk nih a zir a la ngai.

Pound maktaduai 200 man Neymar hi khelmual chhungah hmuhnawm viau mah se mamawh chhanna a la ni rih lo. Hliam leh neuh neuh dang vangin a inlan lo fo a, tun season league match 17 aṭanga goal kua chauh khung hi a man zat nen a inmil lo.

PSG hian rawlthar ṭha bik Kylian Mbappe an kawl a, rintlak viau mah se thlawptu a neih ṭhat tel a ngai. Thiago Silva chhuah hnuah tlarhnung uaptu an ṭha tawk lo, goal 28 an chhuah - champion Lille aiin goal ngain an chhuah hnem zawk.

"A ropui dan hi sawi vak ngaihna pawh a awm lo zawk. A tawp niah team ṭha PSG chunga kan awm thei hi a chhuanawm. Engkim hi player-te thawhrah a ni, Nimes kan ngam loh hnu lawka anmahni mual ngeia PSG kan va hneh te kha ka theihnghilh tawh lo ang," - Christophe Galtier, Lille Coach

"Angers khan thil eng emaw tak min tihsak kan beisei a, mahse chutiang chu a thleng ta si lo. Professional kan nih ang takin keimahni thawh ve tur chin chu kan zo a, hnehna pawh kan chang ngei. Mahse a tawp nia hnehna chan chauh hi champion nan a tawk ta si lo," - Mauricio Pochettino, PSG coach