Champions League khel tur Juve leh Milan
Serie A season khar niah Juventus an nui ve ta. Mahse, an lawmna chhan hi nomawi chawi vang ni loin season thara Champions League khel tura an tlin vang a ni - Old Lady bakah hian AC Milan pawh inelna sang khel turin an tling ve bawk.
A sang pali zinga tel beisei Napoli erawh Hellas Verona lakah an chak zo lo a, coach rorum Gennaro Gattuso-a'n a tum ram a thleng zo lo a, season tawp rualin Naples khawpui a chhuahsan nghal ang.
A tawpah Juve
Andrea Pirlo enkawl Juventus hian pangana ni chungin league match hnuhnung ber an khel a, an tan chak ringawt a tawk lo - Milan leh Napoli inkhel result an ngaihchan tel bawk avangin boruak a rit hle.
Bologna mualah Cristiano Ronaldo chu inkhel bul ṭantir a ni lo, bench lamah hun a hmang. Turin club hian goal khung kawngah erawh harsatna an tawk lem lo. Alvaro Morata-a'n goal hnih a khung bakah Federico Chiesa leh Adrien Rabiot ten goal khat ve ve an khung bawk.
Italian manager Pirlo nauten an hnathawh tur chin tlin takin an thawk zo a, inkhel dangah Napoli leh Hellas Verona te 1-1 in an inhnehtawk tih an hriat zui avangin an lawmna a zual. Point 78 hmuin palina ni chungin season an khar.
Ronaldo a nghing?
Champions League nomawi chawi duh vangin Ronaldo an lalut a, season thum an hman tawh chinah an la hlawhtling lo - kuminah phei chuan UCL title lak chu sawi loh, a khel turin an tling hram chauh a ni.
Turin khawpui aṭanga a car man to a phurhchhuah chuan sawi zui a hlawh, chak ngei ngei ngaihna inkhelah bul a ṭan loh zui avangin Portuguese forward hma lam hun hi a chiang lo zual niin a lang hman.
Pirlo chuan, "Coppa Italia final kan khel zo chauh a, chuvangin Ronaldo kha a chau. Player ṭha kan ngah a, chuvangin Morata kha khelhna hun ka pe," tiin a sawi a, Cup an chawi bakah UCL khel tura an tling chu a lawmthu a sawi bawk.
Ronaldo hian tun season-ah goal 29 a khung a, top scorer a ni. Inter Milan champion puitu Romelu Lukaku aiin a khung tam.
Milan an tling
Season tir lamah an kal vung viau a, champion tura rinkai an ni hman. Mahse a laihawlah an zuih avangin Milan hi UCL khel lo thei dinhmunah an ding hman a, chak ngei ngei ngai chungin Atalanta an lenchilh.
AC Milan hian Franck Kessie goal hnih hmangin hnehna an chang a, 2013-14 season hnua a vawi khat nan Champions League an khel ve leh dawn - Zlatan Ibrahimovic an kawl avangin an chanchin hi a la ngaihnawm zel dawn.
Milan manager Stefano Pioli chuan, "Season tluana kan hun hman dan thlir chuan pahnihna ni chunga hun tawp hman hi kan phu. Kan chakna thuruk chu kan chetsual hnua kan beidawng ve ngai lo hi a ni, a tawpah chuan kan thla a muang ta," a ti.
Mangṭha Gattuso
Serie A match hnuhnung ber an khelh zawh hnuah Napoli chairman Aurelio De Laurentiis-a'n an coach Gattuso thlahna thu sawiin, "Duhtak Rino, season hnih chhung hun kan hman kha a hlu. I hnathawhte avangin lawmthu ka sawi," a ti.
Gattuso hian December, 2019 aṭang khan Napoli hi a enkawl a, a season hmasa hian Juventus hnehin Coppa Italia a chawipui a, kuminah pawh season ṭha pangngai tak chu an hmang - mahse boruak ṭha lo neuh neuh an neihna erawh a rei tawh.
Mahni thu duh ve tak Gattuso hi club thuneitute nen an inmil lo fo a, season laklawh lai pawh khan chhuak tur angin thawm a ri ring hman. A chhuah takah chuan Luciano Spalletti chu a hmun ruak luah tura rin kai a ni.