Goal khung tam ber Kane

England captain Harry Kane-a'n Premier League match hnuhnung bera Tottenham Hotspur-in Leicester City 4-2 a an hneh ṭumin goal a khung bakah assist a nei tel a, tun season Premier League Golden Boot leh Playmaker award a dawng.

Kane hian goal 23 a khung a, amah hnaih bertu Liverpool forward Mohamed Salah-a'n match tawp berah goal a khung loh avangin Spurs striker hi goal khatin a pha lo.

Kum 27 mi Kane hi vawi thum top scorer a nihna a ni a, amah tih loa vawi thum golden boot dawng thei chu Premier League Hall of Fame-a dah luh nghal Newcastle United striker hlui Alan Shearer leh Arsenal legend Thierry Henry-te chiah an awm.

Spurs striker Kane hian vawi 14 assist a nei a, Man United leh Man City-te chhuanvawr Bruno Fernandes leh Kevin De Bruyne ten vawi 12 ve ve assist an nei thung.

Man City keeper Ederson chuan kum zawnin Golden Glove award a dawng a, tun season-ah vawi 19 clean sheet a nei. Brazilian keeper Ederson hnuaiah hian Chelsea keeper Édouard Mendy (vawi 16 clean sheet) leh Emiliano Martinez (15) te an awm.