Zanin dar 12:30-ah Europa League Final : Villarreal vs Manchester United

Europa League final chu zanin dar 12:30 hian Poland khawpui pakhat Gdansk-ah khelh a ni dawn a, Villarreal leh Manchester United te an inhmachhawn ang.

Yellow Submarine tan Europe inelna liana final an luhna hmasa ber ni mah se an manager hi vawi thum champion tawh Unai Emery a nih miau avangin dah hniam theih an ni lo.

Villlarreal hi La Liga-ah pasarihna an ni a, Europa League-a an champion a nih chuan season tharah Champions League an khel dawn. Hei hi nomawi tluk zeta pawimawh a nih avangin si ruk lain an thawk chhuak ang.

Manchester United erawh manager Ole Gunnar Solskjaer hnuaiah an la champion lo a, tun ṭum hi final an luhna hmasa ber a ni thung.

An inthlau
Final khel tur pahnih hi an sum dinhmun aṭanga teh a nih chuan Manchester United buk a rit zawk. English club kum khata sum lakluh hi pound maktaduai 509 a nih laiin Villarreal erawh pound maktaduai 86 vel a ni a, a let nga vel daih a tling.

Player hlawhah United-in pound maktaduai 284 an seng a, Yellow Submarine sen let li (£73m) a tling pha. Squad hlut zawngah an la inthlau lehzual. Man United player man hi pound maktaduai 831 a nih laiin Villlarreal hi pound maktaduai 142 a nia, a let ruk daih a ni.

Champion duh United
Solskjaer-a'n champion ngei a duh a, Pathianni zana Premier League match hnuhnung bera Wolves 2-1 an hneh ṭumin player pawimawh ho a hahdamtir vek. Ni hnih vel lek inpuahchan hun awmin lang mah se Wolves lakah player pawimawh a chhawr miau loh avangin May 18 zana Fulham nen 2-2 a an inhnehtawk hnuah Europa League final atan an insawrbing ṭanah a ngaih theih.

Man United captain Harry Maguire chu inhliam vangin a inlan theih a rinawm lo a, hliam vangin Anthony Martial a tel thei dawn lo bawk. Tlarhnungah Victor Lindelof leh Eric Bailly te an inkawp hmel a, United ṭantute tan ngaih ngam taka inkhel en a harsa ang.

Amaherawhchu Bruno Fernandes leh Edinson Cavani ten Europa-ah goal nga ve ve an khung tawh a, zaninah pawh player pahnih hi pawimawh leh dawn. Portuguese midfielder hian tun season inelna hrang hrangah match 57 khelin goal 28 a khung a, assist vawi 18 a neih bawk avangin a rintlak tih a chiang. Final a nih tawh avangin penalty pet a ṭul thei a, Fernandes aia ṭha tur an awm chuang lo.

Villarreal hian an match hnuhnung bera Real Madrid an hmachhawn ṭumin goal venhim an thiam tih a lang a, chutihrualin striker ṭha bik Karim Benzema ten a tawn tlang dan an hre thung. Yellow Submarine-in defensive game an khelh a rinawm a, tawnhriat nei ṭha Cavani-a'n a thiam thil a lantir a ṭul ang.

Solskjaer-a'n 4-2-3-1 formation a hmang ngun a, defence thlawp turin Scott McTominay leh Fred te an awm a rinawm. Midfielder pahnih khelh dan hian an dinhmun thui tak a hril dawn. Fernandes vangin French midfielder Paul Pogba-a'n fak a hlawh tawk ṭhin lo a, Europa League final erawh Portuguese midfielder aiin a ṭangkai thei. Tlarhma lamah rawlthar duhawm Mason Greenwood hming lam hmaih a thiang lo - a awm hnuah Marcus Rashford pawh first eleven chianga dah theih a ni lo.

Yellow Submarine
Villarreal hian Gerard Moreno, Carlos Bacca, Paco Alcacer, Raul Albiol leh Pau Torres te nan kawl a, Arsenal hnehtu Yellow Submarine hi champion turin an ṭha tawk. Bacca hian Europa League-ah Sevilla vawi hnih a champion pui tawh a, Spanish striker pahnih Moreno leh Alcacer ten Europa League-ah goal ruk ve ve an khung a, Man United forward-te aiin an khung tam zawk.

Spain squad-ah Real Madrid-in player an thawh theih loh laiin Moreno leh Torres te an tel bawk. Kum 29 mi Moreno hian tun season-ah goal 29 a khung tawh a, a chet ṭhat ber season a nih avangin inrintawkna a ngah ang.

Final chin tawhah chuan goal venghim tura defender ṭha neih a pawimawh a, Villarreal hian veteran defender Raul Albiol leh Europe club ṭha awh rawn Pau Torres an kawl. Valencia aṭanga lar chhuak Raul Albiol hi kum 35 mi ni tawh mah se Napoli-ah kum ruk a awm hnuin a hma ai mahin a ṭha emaw tih tur a ni a, tlarhnung aṭangin team a ho ṭha hle.

Spanish club hian Liverpool defender hlui Alberto Moreno an kawl a, ani hi Reds-in final-a Sevilla an hneh loh ṭuma mawhphurtu anga an ngaih a ni. Amaherawhchu Moreno chuan, "Kan chak lo chhanah khan mimala mawhpuh theih ka nihna chhan ka hre lo a, team pum pui angin kan khel ṭha lo," tiin a sawi chhuak a, final khel tawh player hi Manchester United lakah a ṭangkai thei a, mah se Alfonso Pedraza a awm avangin a awl thei bawk.

Engtin zel?
Villarreal hian Tottenham aṭanga loan hmanga an hawh Juan Foyth leh winger Samuel Chukwueze te an dam leh tawh a, final-ah an inlan theih a beiseiawm.

Nigeria tana khel pha kum 22 mi Chukwueze hi a che rang a, Man United tlarhnung tan a hnawksak thei ang. Semifinal-a hrem vanga khel lo Spurs leh Watford midfielder hlui Etienne Capoue pawh chhawr theih a ni tawh bawk.

Chutihrualin team ṭha zawk erawh Man United an ni a, Solskjaer-a hote hi an champion a nih ngat chuan nipui transfer-ah player ṭha lakluh a awlsam phah sawt ang.

Entu awm dawn
Final-ah hian stadium Stadion Miejski-a mipui leng zat 25% in inkhel an en thei dawn a, mi 9,500 an awm thei dawn tihna a ni.

Man United hian ticket 2,000 an chang a, ticket chang pha tur chuan vanneih tel a ṭul ang.

Europa League specialist Emery
Arsenal manager hlui Unai Emery hi Europa League-ah 'legend' tiha sawi theih a ni a, London club a zawm hma khan Sevilla chu kum zawnin vawi thum a champion pui tawh a ni. Emery hian kum 2014 khan Sevilla a champion pui a, hemi ṭum hian final-ah Benfica nen hun pangngaiah 0-0 a inhnehtawkin penalty-ah 4-2 in an chak.

Amaherawhchu league-ah pangana an nih avangin kum 2015-ah Europa League an khel leh a, final-ah Dnipro 3-2 a hnehin a champion. La Liga-ah Sevilla hi pangana bawk ni mah se Europa League champion-in Champions League an khelh theih tak avangin Europe inelna sang berah an tel a, Man City leh Juventus tluk loin group stage-ah an tla. 

2016-17 season-ah hian Emery hote hian Europa League khel zuiin final an lut leh a, nomawi inchuhnaah English club lar Liverpool 3-1 in an hneh. Emery hoten a zawna vawi thum nan an champion a, Spanish manager hian Italian manager Giovanni Trapattoni record a nih rual.

Emery hian PSG enkawlin Champions League-ah beisei a pha lo. French club aṭangin Arsenal a pan a, Europa League-ah erawh a ṭhat ngaiin a la ṭha reng. London club hi final luh pui leh thoin 2019 final-ah Chelsea 4-1 in an hneh lo. Kum 49 mi Emery hian Villarreal a enkawl a, season khatna lekah Europa League final a thlenpui nghal. Player thlirin Yellow Submarine hi an ṭha lo zawk a ni thei a, mah se Unai Emery an nei tlat.

Player 26 zingah Maguire a tel
Manchester United-in Europa League-a tel tur player 26 an puang a, Aston Villa nena an inkhelh ṭuma inhliam Harry Maguire chu squad-ah telh a ni. 

Kum 28 mi Maguire hian a ke rek inhliam vangin Leicester City, Liverpool, Fulham leh Wolves te a hmachhawn tawh lo. Ole Gunnar Solskjaer chuan, "Nilaini chawhnu thleng Maguire hi hun ka pe dawn, mahse beiseina nei sang lutuk suh u," tiin a sawi.

Manchester United hian Maguire awm loh hnuah clean sheet an la nei lo a, English defender hian sawisel tawk ṭhin mah se Solskjaer-a'n tlarhnungah ani aia ṭha thlan tur a nei lo. Man United captain Maguire chuan, "Season liam ta aṭang khan nasa takin hma kan sawn. Pahnihna hi chu a ṭha tawk lo a, ka teammate-te pawhin an pawm vek ka ring," tiin champion a pawimawh thu a sawi.

Man United Squad
Goalkeepers David De Gea, Dean Henderson, Lee Grant, Nathan Bishop
Defenders Eric Bailly, Victor Lindelof, Harry Maguire, Luke Shaw, Alex Telles, Axel Tuanzebe, Aaron Wan-Bissaka, Brandon Williams
Midfielders Amad Diallo, Bruno Fernandes, Fred, Daniel James, Juan Mata, Nemanja Matic, Scott McTominay, Paul Pogba, Donny van de Beek
Forwards Edinson Cavani, Anthony Elanga, Mason Greenwood, Marcus Rashford, Shola Shoretire

A la goal ngai lo
Manchester United leh Villarreal te hi Champions League group stage-ah vawi li an inhmachhawn tawh a, goal lut loin an inhnehtawk vek. September 14, 2005 khan a vawi khat nan an inkhel a, Villarreal-ah hian Spain-in Euro 2008 an champion ṭuma player pawimawh Marcos Senna te kha an la awm. Villarreal khelmual El Madrigal-ah goal awm loin an inhnehtawk a, November 22-a Old Trafford-ah an inhmachhawn ṭum pawhin goal a lut chuang lo.

September 17, 2008-ah Champions League champion Manchester United chu El Madrigal-ah an lenglut a, United ṭhat vanglai ni mah se goal an khung thei lo. English club hian Cristiano Ronaldo leh Wayne Rooney te vanglai kawl mah se Old Trafford-ah goal an khung lo. Goal awm loin bawkin an inhnehtawk.