English football-a Manager ṭha ber Pep Guardiola
English football-a manager award ngaihhlut ber League Managers Association's manager of the year atan Pep Guardiola puan a ni a, Manchester City boss hian he award hi vawi hnih a dawnna a ni.
Pep hian Premier League leh League Cup-ah City-a champion pui a, an club chanchina a vawi khat nan Champions League final khelh an la hmabak bawk. Kum 50 mi coach chuan, "A vawi hnih nana LMA manager of the year chawimawina ka dawng thei hi ka lawm takzet a, ka manager puiten an thlan a nihna hian ka tan chuana tihlu lehzual a ni," a ti.
Pep hian he chawimawina dawng tur hian Leeds United boss Marcelo Bielsa, Norwich City coach Daniel Farke, Chelsea Women's team boss Emma Hayes, West Ham manager David Moyes leh Leicester City boss Brendan Rodgers-te a khum a ni.
Player-te vang a ni
Pep-a'n kum 2016 khan City a zawm a, Premier League (3), FA Cup (1), League Cup (4) leh Community Shield nomawi a chawi tawh a, Champions League final-a Chelsea an hneh chuan City-a a hnathawh ropui berah chhal a ni ang.
Kum 2018-a LMA award lo dawng tawhtu coach chuan, "Hetiang award dawng tur chuan player ṭha tak tak neih a ngai a, ka player-te hi thawhpui an nuam ṭhin takzet.
"Season hmachhawn hautak ber kan hmachhawn meuh pawhin an inpekna leh tumna a danglam chuang lo," a ti a, a player-te avanga chawimawina dawng a nih thu a sawi.
Pep chuan sawi zawmin, "Ka staff-te pawh hian fak an phu takzet. City hi a ṭha thei ang ber kan nih theih nan ni tinin an theihna zawng zawng an hlan ṭhin a ni. Chuvang chuan he award hi an tan ka hlan a, keima dawn bik a ni lo," a ti a, a thawhpuite a hre reng.
Chawimawina dang
LMA manager of the year award dawng thei tura coach paruk chhawpchhuah zinga hmeichhe coach tel hmasa ber Hayes chu FA Women's Super League manager of the year award hlan a ni a, ani hian Chelsea hmeichhe team chu league nomawi a chawipui bakah Champions League final-a luhpui.
Premier League-a Norwich kirpuitu Farke chu Championship coach of the year atan thlan a ni a, Grant McCann (Hull City - League One), Michael Duff (Cheltenham Town - League Two) leh Jonathan Morgan (Leicester City - Women's Championship)-te chu an division telna ṭheuha manager ṭha berah thlan an ni bawk.
Rangers coach Steven Gerrard chu Scottish Premiership-a a hnathawh ropui avangin LMA Special Achievement Award hlan a ni a, Premier League hall of fame-a lakluh hlim coach tan season duhawm a ni.
Kum 40 mi coach hian Scottish Premiership-ah tlawm nei miah loin Rangers chu a champion pui a, SFWA manager of the year, PFA Scotland manager of the year leh SPFL Premiership manager of the year award-a dawng tawh bawk.