Tuchel-a'n Mendy inlan theih a beisei

Chelsea boss Thomas Tuchel chuan a keeper inhliam Edouard Mendy chu Inrinni zana Cham­pions League final an khelh hunah a inlan theih a beisei thu a sawi.

Kum 29 mi keeper hian Aston Villa nen an inkhelh ṭumin Bertrand Traore goal khung tur a tauhna lamah a nakah hliam a tuar a, second half-ah goalkeeper Kepa Arrizabalaga chuan a thlak a ngai hial.

Thawhṭanni zan thleng kha chuan Chelsea hian hlauthawng takin an keeper dinhmun hi an thlir a, an endik hnuah erawh Tuchel chuan an keeper chu Champions League final-a inlan thei dinhmunah a din thu a sawi.

Tuchel chuan, "Na a ti lutuk kha tunah chuan a zia tawh a, a dam ṭhat chuan Edou hi a inlan dawn.

Nilainiah training a rawn zawm theih kan beisei a, a thei ta lo a nih chuan Ningani leh Zirtawpni pawh kan ngaichang leh mai ang," a ti a, Mendy chhawr ngei a tum hle.

German coach chuan sawi zawmin, "Edou hi a inkhel thei ta lo a nih pawhin keeper ṭha tak Kepa kan la nei tho a ni. Tunah rih chuan a test result a ṭha a, kan zinga a khelh theih chuan kan tan a ṭha dawn a ni," a ti.

Chelsea hian Inrinni zan dar 12:30-ah Manches­ter City nen European champion nih an inchuh dawn a, Tuchel chuan mal­pui hliam nei, midfielder N'Golo Kante dinhmun pawh a ṭhat thu a sawi.