Germany coach thar Hansi Flick

Euro 2020 khel tur Germany chuan inelna zawh ruala an ram team enkawl tur an puang a, Joachim Low hmun ruak luah turin Hansi Flick an lakluh thu an puang.

Tun season zawh ruala Bayern Munich chhuahsantu Flick hian kum thum chhung atan contract-a ziak a, kum 2024 thleng Germany hi a enkawl dawn tihna a ni.

Flick chuan, "Thil reng reng hi chak takin a kal vek a ni ber a, Euro zawh hnu aṭanga Germany ka enkawl thei tur hi ka lawm takzet a ni," a ti.

Assistant to coach
Kum 56 mi Flick hi Germany team-ah a mikhual lo. Kum 2006-2014 inkar khan Germany assistant coach hna a lo chelh tawh a, a thlak tur Joachim Low nen an thawkdun ṭhin.

Mahse, 2014-a World Cup nomawi an chawi hnu khan assistant coach a nihna aṭangin a chawl a, January 2017 thleng khan Germany national team-ah hian Sporting Director hna a chelh zui.

July 2019 khan an ram club ṭha Bayern Munich a zawm a, German club ṭha a zawm dan erawh coach puitling ni tur ni loin Niko Kovac-a assistant coach ni turin a ni.

A tak ram
Flick-a'n German coach a nih rualin mak tak maia thil thlen chakzia a sawi a, a dik - November 2019 khan a pu Kovac chu Bayern-in a hna aṭangin an ban a, Flick hi coach lailawk tur atan ruat a ni.

German coach hian a hna a thawk ṭha a, mahse, club lian Bayern tan rinna pum hlum nghah chu la harsa tak a ni - December 2019 thleng atan contract an ziahpui leh phawt!

Boruak sang karah pawh Flick-a talbuai lo a, April 2020 khan kum 2023 thleng atan Bayern-in contract an ziahpui ta nge nge a, Bayern tana a season hmasa berah hian Bundesliga, DFB-Pokal leh Champions League nomawi a chawi a, treble champion an ni!

Sulhnu ropui chu
Kumin kumtir khan Flick hi Bayern thuneitute nen an inhmuhthiam loh thu a ri ṭan a, April 17 khan Flick hian club hnenah season tawpa chhuah a duh thu a hrilh thu a sawi.

Player a nih laia Bayern tana Bundesliga nomawi pali chawitu Flick hian German champion-a kaihhruai chhung hian match 86 an hmachhawn hman a, vawi sarih chiah an tlawm a, vawi 70 chakin vawi kua an khingpui an inhnehtawkpui.

Flick hian German club tan nomawi chawi theih ang chu a chawi kim a, Bundesliga (2), DFB-Pokal (1), Champions League (1), DFL Super Cup (1), UEFA Super Cup (1) leh Club World Cup (1) ah te a champion.

Germany tan lawmna
Hoffenheim coach pawh lo ni tawh Flick-a'n Bayern-ah rei lote chhungin coach langsar tam tak tih theih loh a ti a, Bayern-a chhuahsan dawn tih a chian khan European club lian tam tak hming a ri nghal.

Barcelona hming a ri ring fal a, Flick tan club enkawl châkawm tak ni mah se assistant coach a lo nih tawhna Germany enkawl a thlang a, April khan a thuphungin an ram team hi inremna a lo neihpui hial tawh - Flick chuan ṭawngkam maia inrem ni mah se a thusawi sut hi a duh lo a, tunah chuan contract a ziak ta.

Flick hian September international break aṭangin Germany coach a nihna anga a hna chu a ṭan ang a, September 2 zanah a match hmasa ber khelin World Cup qualifier-ah Liechtenstein an hmachhawn ang.