Giannis-a hoin Bucks an chak zel

Nimin zing khan Milwaukee Bucks chuan Miami Heat lakah 132-98 in hnehna an chang a, NBA playoff khelh laiah vawi hnih an chak ta; best of seven series-ah 2-0 in hma an hruai, Zirtawpni zingah game 3 an khel leh ang.

Bucks tan hian Bryn Forbes-a'n chawlhlawk hmain 3-points vawi nga ngawt a vawm lut hman, inkhel pumpuiah erawh point 31 neitu Greek tlangval Giannis Antetokounmpo chu player langsar ber a ni.

Antetokounmpo chuan, "Mimal thil tih ṭhat ka en duh rih lo, a pawimawh ber chu kan team kan chak em, tih hi a ni. Player zawng zawng kan khelh ṭhat hian ka hlim ṭhin," tiin team a ngaih pawimawh thu a sawi.

Inkhel dangah Denver Nuggets chuan Portland Trail Blazers chu 128-109 in an hneh a, team pahnih hi series-ah 1-1 in an inhnehtawk mek. Hnehna an chan theih nan hian Nikola Jokic (38 points) leh Michael Porter Jr (18) te an thawh hlawk hle.