Madrid-ah Modric-a cham dawn

Real Madrid midfielder Luka Modric chuan season khat dang Santiago Bernabeu-a cham turin contract thar a ziak a, a hma hun chiang lo reng chu chinfel a ni ta.

Kum 35 mi Modric hian August 2012 khan Tottenham Hotspur aṭangin Real hi a zawm a, hetihlaia pound makta­duai 33 man midfielder hi a chhuah hunah chuan Real legend zinga chhiar tel a ni tawh ang.

Ballon d'Or 2018 dawngtu Modric hian Real tan inelna hrang hrangah match 391 khelin goal 28-a khung a, assist vawi 61-a nei bawk.

Real tan nomawi chawi tur ang chu a chawi kim a, La Liga (2), Copa del Rey (1), Spanish Super Cup (3), Champions League (4), UEFA Super Cup (3) leh FIFA Club World Cup (3) ah te a champion tawh.

Modric hian World Cup 2018-ah khan Croatia chu final-a luhpui a, Euro 2020-ah pawh an ram team tan captain armband hreng chungin a feh chhuak leh ang - England nen June 13-ah Wembley Stadium-ah an match hmasa ber an khel ang.