Enrique-a'n Ramos-a koh loh chhan a sawi

Kum 1923 hnua a vawi khat nan Spain squad-ah Real Madrid player an awm lo a, Spain-in Real player-tel loin a vawi khat nan major tournament an hmachhawn dawn - koh loh langsar chu Sergio Ramos a ni.

Spain coach Luis Enrique hi Barcelona boss hlui a nih avangin Real huatna avanga Madrid khaw club player-te ko lo ang hiala sawina a awm a, Enrique chuan he puhna erawh a pha thung.

Thutlukna huaisen thlak tak siamtu Enrique chuan, "Ramos hian hliam vangin inelna a hmachhawn hleithei lo a, training takngial pawh a nei thei lo. Ramos-te ang player koh loh hi thil harsa tak a ni a, a hmain phone-in ka be lawk thlap a, thutlukna hrehawm tak a ni," a ti.

Enrique chuan Ramos tan Spain-ah hmun a la awm thu sawi zuiin, "Mahni hma ngai tak chunga thawkin dam thuai se ka duh a, club leh ram tan inkhel leh se ka duh a ni," a ti - Real captain hi regular takin inkhel leh phawt se, a duh tihna a ni.

Kum 51 mi coach hian mak takin Real defender Nacho Fernandez leh Marco Asensio pawh a ko lo a, hliam vangin Dani Carvajal-a ko lo bawk.

Player 26 koh theih aṭanga 24 kotu Enrique chuan, "Carvajal leh Ramos hi in 'fit' se chuan ka squad-ah an awm em em ang," a ti a, koh loh chhan dang a neih loh thu a sawi.

Enrique-a koh loh langsar zingah Iago Aspas-a tel a, kum 33 mi striker hian season hman zawh takah khan inelna hrang hrangah khan match 34 khelin goal 14-a khung a, assist vawi 15-a nei bawk.

Celta Vigo striker hian La Liga bikah assist vawi 13-a nei a, ani aia assist ngah zawk an awm lo - heti chunga Spain squad-a telh a ni lo hi a mak hle.

Athletic Bilbao centre back Inigo Martinez, Real Betis playmaker Sergio Canales leh Sevilla full back Jesús Navas-te pawh hi squad-a koh an nih loh vanga an vui a nih chuan dem theih an ni lo.