Ruahman angin kan la kal - IOC president

International Olympic Committee president Thomas Bach chuan Tokyo Olympic chu an ruahman anga an kaltlangpui tur thu a sawi a, ram mipui zingah thlen loh duhtu tam mah se ṭhulh tumna an nei rih lo.

Nikum khan coronavirus vangin infiamna khawmpui lian hi neih theih a ni lo, kum khata sawn khawtlai a ni. Hri leng hi a la reh thei lo a, tun dinhmunah Japan hian hri leng thawh lina an hmachhawn mek.

Mi hrang hrangin zirchianna leh mipui ngaihdan an lak chuan Olympic thlen loh emaw, a hun sawn leh mai emaw duhtu an tam zawk zel. Mahse, sorkar thuneitu lam chuan Olympic hi thlen ngei an tum thu an sawi nawn ve fo thung.

IOC president Bach chuan, "Tokyo Olympic chu kan hma lawkah a awm ta, tunah chuan infiamna khawmpui lian thleng turin ni kan chhiar liam tam a ngai tawh lo, hun rei lote hnu maiah a lo thleng tawh dawn.

"Mipui himna leh hriselna chu kan ngaih pawimawh ber a ni. Hri leng vanga harsatna karah hian Japanese mipuite nena ṭangrual chungin Olympic hi hlawhtling taka neih theih ngei a beisei awm. Tunah hian infiammi leh official tur zinga 70% chu vaccine pek an ni tawh," a ti.

Japan sorkar pawhin theihtawp a chhuah, a bik takin khawpui lian pahnih Tokyo leh Osaka-ah te chuan mipui nawlpui tana vaccine lakna hmun a buatsaih a, heta ṭang hian ni tin mi sang chuangin vaccine an la ṭhin.