Shapovalov a inhnukdawk

Tun kar tawp aṭanga khelh tur French Open-ah Denis Shapovalov a inlan thei dawn lo. Canadian tlangval hian a dar (shoulder) hliam vangin Paris khawpui a pan theih loh tur thu hi a tichiang tawh.

Kar hmasa khan Geneva Open-ah Shapovalov hi a inlan a, final lut mah se Casper Ruud lakah 7-6 (6), 6-4 in a chak lo. Player beiseiawm tak hian French Open khelh ngei duh mah se a team leh damdawi lam thiam ten chawl rih turin thurawn an pe.

Kum 22 mi Shapovalov chuan, "Ka medical team lamin chawl rih turin min ti, khawl hmanga ka dinhmun endikna chu a ṭha pangngai viau a, mahse natna hi a la reh mai lo thung. Tun dinhmuna ka tana ṭha ber chu inkhel loa chawlh hahdam a ni, 2022 Roland-Garros-ah kan inhmu dawn nia," a ti.

Hri leng vangin French Open hi a khelh hun pangngai aiin kar khata sawn hlat a ni. Shapovalov hma hian tun hma lama lo champion tawh Stan Wawrinka leh Simona Halep te chu hliam vang

bawkin an lo inhnukdawk tawh.