Joaquin-a'n chawlh a la tum lo

Real Betis legend Joaquin chuan a club tan kum khat dang khel turin contract thar a ziak a, kum 39 mi ni tawh mah se Spanish winger hian inkhelh chawlhsan tumna a la nei lo.

Betis aṭanga a career ṭantu Joaquin hian July 21-ah kum 40-a tling tawh dawn a, professional footballer ni turin a tha a la tho reng tih contract thar hmangin a pholang.

Joaquin hian season hman zawh takah khan inelna hrang hrangah match 30 lai a la khel thei a, goal hnih khungin assist vawi ruk ngawt a la nei bawk - a la chhe lo.

Spain tan vawi 51 inlana goal li khungtu Joaquin hian Betis tan 2000-01 season-ah khan Segunda division khelin a career a ṭan a, La Liga-ah kaipui zuiin kum 2006 khan Valencia-a zawmsan.

Kum 2002-a La Liga Breakthrough Player of the Year award dawngtu hian Malaga leh Fiorentina tan a khelh leh hnuin kum 2015-ah khan Betis-ah hian a kir leh a ni.

Joaquin hian La Liga-ah match 579-a khel tling tawh a, goal 78 khungin assist vawi 63-a nei - La Liga-a inlan hnem lamah Barcelona goalkeeper hlui Andoni Zubizarreta (622 games) chiah a tluk lo.