England boss Southgate-a'n player 33 a ko

Football khawvela ngaihven hlawh pawl ni reng ṭhin England coach Gareth Southgate chuan Euro 2020 atan squad a puang a, player 33-a ko chhin phawt.

Team tinin squad-ah player 26 bak neih a thiang lo a, a tirah tak chuan Southgate hian player 26 hming puan nghal a tum. Mahse, Manchester United-in zaninah Europa League final an la khel dawn a, Chelsea leh Manchester City-te chu Champions League final-ah an la intawng dawn bawk.

Club pathumin English player langsar an kawl nual a, player tan inhliam theih a la ni - hei vang hian Southgate-a'n final squad a puang nghal lo a, fimkhur takin player 33 a ko phawt.

Euro 2020-ah England hi group D-ah an awm a, Croatia, Scotland leh Czech Republic-te nen an awm ho - Three Lions tan last 16 lut turin hna a harsa lo tura ngaih a ni.

Tel lo an langsar
Southgate-a'n player duhthlan tur a nei ṭha a, thutlukna pawh huaisen taka siam a ngai - player langsar zingah Leicester City chhuanvawr James Maddison, tlarhnung lama chhawr kual theih, Tottenham player Eric Dier leh Burnley keeper Nick Pope-te chu koh loh zingah an tel.

Kum 29 mi Pope hi hliam a neih mek avanga koh loh a ni a, Maddison leh Dier-te erawhin harsatna an nei lo - major tournament-a koh an ni lo hi an tan chuan a 'na' ang.

Leeds United striker Patrick Bamford-a'n tun season-ah league match 38 khelin goal 17 ngawt khung mah se Southgate-a'n England jersey ha turin a ringtawk lo a, Aston Villa tana league match 33-a goal 14 khungtu Ollie Watkins a ko thung.

Manchester United leh City nena sawizawm Danny Ings-a'n tun season-ah hliam leh Covid-19 vanga a buai chungin league match 29-ah goal 12 khungin assist vawi li a nei a, Euro khelh phah nan erawh a tawk zo lo.

Arnold a tel
Liverpool right back Trent Alexander-Arnold chu England-in March thlaa World Cup qualifier an khelh ṭum khan squad-ah telh a ni lo a, hei hian sawi zui a hlawh nasa.

Khawthlang media-te chuan Euro 2020-ah pawh Arnold hi a inlan loh tur thu an ziak nasa a, an titi tui ber a ni - mahse, player 33 zingah Arnold-a tel a, season tawp lama Reds an chet ṭhat vang niin a lang.

Chutihrual chuan right back hi England squad chhahna lai tak a ni a, Arnold bakah hian La Liga-a Atletico Madrid champion puitu Kieran Trippier, Manchester City right back Kyle Walker leh Chelsea defender ṭhangduang Reece James-te chu koh tel an ni.

Southgate-a'n player pasarih a la paih leh dawn a, right back pali aṭang hian pakhat tal chu a la chhawk leh tura ngaih a ni - Arnold emaw Reece emaw chu paih an niin a rinawm.

A vawi khatna
Southgate-a'n ram tana la inlan ngai lo player pali ngawt a ko tel a, Brighton & Hove Albion centre back Ben White, Everton centre back Ben Godfrey, West Brom keeper Sam Johnstone leh Sheffield United si ban nghaktu Aaron Ramsdale-te chu koh an ni.

England-in tlarhnung laia khel turin City defender John Stones, United captain Harry Maguire, Villa vice captain Tyrone Mings leh Wolverhampton Wanderers captain Conor Coady-te an nei a, Godfrey leh White tan final squad-a awm chu a harsa ang.

Goalkeeper pali aṭangin pakhat paih leh tur a ni a, United keeper Dean Henderson leh Everton si ban nghaktu Jordon Pickford-te hi chu tel chiang tura ngaih an ni a, Johnstone leh Ramsdale inkarah Southgate-a'n thutlukna a siam a rinawm.

Keeper pahnih hi Premier League aṭanga an team tlakpui tu ve ve an ni a, chutihrual chuan ram tana la inlan lo ve veah Johnstone hi March thla khan England squad-ah koh tel a ni a, Ramsdale ai chuan chance-a nei ṭha zawkah ngaih a ni.

Rawlthar duhawm
England-in hmabak nei êng player an nei nual a, kum 20 la tling lo player pathum, Borussia Dortmund midfielder Jude Bellingham, Arsenal midfielder Bukayo Saka leh Manchester United forward Mason Greenwood-te koh an ni.

Kum 17 mi Bellingham hi England squad-a player naupang ber a ni a, a naupan anga en chi erawh a ni lo. Birmingham City chuan an chherchhuah rawlthar duhawm hi an club legend a ni tih hriatreng nan a jersey number 22 chu tuma hak tawh loh turin an dah ṭha hial.

Saka hi kum 19 mi lek ni mah se ram tan match li a khel der tawh a, season hman zawh takah khan Arsenal tan inelna hrang hrangah match 46 khela goal sarih khungin assist vawi 10-a nei thei a, en kan a harsa mai thei.

Kum 19 mi Greenwood-a'n tun season inelna hrang hrangah match 51 ngawt a khel a, goal 12 khungin assist vawi ruk a nei - Southgate-a lakah a 'mark' a ṭha lutuk lo a, thutlukna siam dawn tak takah chuan hei hi English coach lu tihaitu a tling ang.

England squad 33
Goalkeepers: Dean Henderson (Man Utd), Sam Johnstone (West Brom), Jordon Pickford (Everton), Aaron Ramsdale (Sheff Utd)
Defenders: John Stones (Man City), Luke Shaw (Man Utd), Harry Maguire (Man Utd), Trent Alexander-Arnold (Liverpool), Kyle Walker (Man City), Tyrone Mings (Aston Villa), Reece James (Chelsea), Conor Coady (Wolves), Ben Chilwell (Chelsea), Ben Godfrey (Everton), Kieran Trippier (Atletico Madrid), Ben White (Brighton)
Midfielders: Mason Mount (Chelsea), Declan Rice (West Ham), Jordan Henderson (Liverpool), Jude Bellingham (Borussia Dortmund), Phil Foden (Man City), Jack Grealish (Aston Villa), Kalvin Phillips (Leeds), Jesse Lingard (Man Utd), James Ward-Prowse (Southampton), Bukayo Saka (Arsenal)
Forwards: Harry Kane (Tottenham), Marcus Rashford (Man Utd), Raheem Sterling (Man City), Dominic Calvert-Lewin (Everton), Mason Greenwood (Man Utd), Ollie Watkins (Aston Villa), Jadon Sancho (Borussia Dortmund)