Arsenal leh Burnley intiat tawk

Pathianni zan Premier League inkhelah Arsenal leh Burnley te goal awm loin an inhnehtawk a, mikhual Gunners hi an lama lut tur goalline 

aṭanga a sawh chhuah leh vanga point hmu an ni.

Clarets hian an intawn hnuhnung 11 zetah Arsenal hi an ngam lo vek, mahse tun ṭumah erawh hnai tak aṭanga Jay Rodriguez ball pet chuan bar a per a, a per let chu goalline-ah tlain a chhuak zawngin ball a kal hlauh.

Mikel Arteta enkawl Gunners hi tun hnaiah inelna hrang hrang an hmachhawnah vawi sarih chu an tlawm lo, mahse chak ni hmel an hmuh hleihtheih loh avangin league table-ah chuan 10-na an ni a, an hnuai chiaha awm Burnley bakah Newcastle leh Southampton te nen point 31 ve ve an hmu mek.

Arteta chuan, "Tlarhma lam khan ṭha taka hun rei deuh zawk khelh theih an mamawh, thil tam tak zir chhuak tawh mah ila goal sual chhuak turin hmasawn kan la mamawh hle," tiin a sawi.

Arsenal tan hian captain Pierre-Emerick Aubameyang chuan hremna hmang zoin a inlan thei tawh, Gabon international hian hnai tak aṭangin goal zawnah a tauh thei lo - tlarhma laia awm Alexandre Lacazette pawh goal hmaah a la hriam lo chhunzawm zel bawk.

North London club hian February 16 hian Emirates Stadium-ah Newcastle an mikhual dawn, chumi hma chuan Dubai lamah training an nei rih dawn. February 7, Zirtawpni hian Dubai an thleng ang.

Arteta chuan, "Match khelh hmabak hautak kan nei chho dawn a, chumi hmain boruak lum zawkna hmunah training kan nei thei tur hi a lawmawm. Taksa leh rilru lamah inbuatsaihna ṭha tak kan neih ngei ka beisei, an hmunhma leh hmanraw neih pawh khawvela a ṭha ber zinga mi a ni," tiin a sawi.