Champion aṭanga ni hnih lekah Galtier a bâng

France Ligue 1 champion Lille coach Christophe Galtier chuan nomawi an chawi aṭanga ni hnih hnu lekah a hna a bansan. Season tharah chuan team dang a enkawl a rinawm - Lyon leh Nice te chu a enkawl theih tur anga sawi an ni.

Kum 54 mi Galtier hian Lille hi Paris St-Germain chunga awmin a champion pui a, mahse season laklawh laia club neitu an inthlak aṭang khan coach hi a chhuak dawn nia sawi a awm tawh, tunah a takin a lang chhuak.

Galtier chuan, "Ka hun tawp chu ka hmang tawh niah ka ngai," tiin chanchinbu lian L'Equipe a hrilh. Lille chuan season li hnua an coach banna hi an pawm thu an sawi, amah zah tak chungin an pawm thu an sawi ve nghal.

Marseille tlangval hian Marcelo Bielsa thlakin 2017 December thla aṭangin Lille hi a enkawl ṭan. Khatih lai khan Lille kha tlak hlauhthawn awmah an awm, a in hamtanpui a, a hnuah chuan pahnihna leh palina dinhmun a luahpui.

Team nghet tak a din chho zel a, season puitling pangngai vawi thum a enkawl meuh chuan Ligue 1 champion an ni der. Manager thawm nei lian lo tak ni mah se, team dang a enkawl a nih pawhin ngaihven a hlawh chhunzawm zel tawh dawn.

Galtier leh Lille Thawnthu ngaihnawm
Ṭhenkhat chuan sum tam tak sengin player an leikhawm a, an player chhawrte hlawh atana an sum hman pawh tam tak a ni - sum hmangin team an din a, a tawpa an nomawi chawi pawh sum hmanga lei chhuah ang hiala sawi theih te a ni ṭhin.

Football chu sum hmangin thui tak thunun a ni a, a neisa pek belh an nih laiin a nei lo zawkte chu an bet tawlh tawlh emaw tih mai tur a ni. Mahse, Lille chuan football hi sum hmanga lei vek theih a nih bik lohzia an rawn tarlang leh ta. Khawvel huap pawha sum hmang hnem leh player nei ṭha Paris St-Germain khumin Lille hian French Ligue 1 nomawi an chawi a, match 38 khelh zawh hnua sang zawk an nih miau avangin an champion hi tihpalh vang a ni thei lo.

Manager ropui leh langsar tak ni lem lo Christophe Galtier enkawlna hnuaia Lille zinkawng hi a ngaihnawm. PSG sum hman zat hmun lia ṭhena hmun khat pawh hman tur an nei lo a, an elpui club chhawr duh loh player la khawm chungin an champion ta rup mai si.

An hnawl te kha...
Lille player neih zawng zawng hlut zawng hi pound maktaduai 126.5 nia chhut a ni. Pound maktaduai 200 man Neymar leh maktaduai 165.7 man Kylian Mbappe kawltu PSG nen chuan khaikhin chi pawh an ni lo, sum chu in ngah hleih vet vet tak an ni.

PSG lamin chawr tlak loha an ngaih - goalkeeper Mike Maignan, midfielder Boubakary Soumare, leh forward pahnih Jonathan Ikone leh Timothy Weah-te chu Lille hian an lakhawm a, an hlawhtlin theih nana player pawimawhah an chher chhuak.

Southampton, Crystal Palace leh West Ham United tana khel tawh, kum 37 mi Jose Fonte chu tlarhnunga rinrawl a la ni thei. Arsenal pantu Gabriel thlak nana an lakluh Sven Botman leh Fonte inkawp hian league goal 23 chauh an chhuah, an chhuah tlem ber. Tlarhma lama player pawimawh Burak Yilmaz chu kum 35 mi a ni tawh, tun hmain China ramah a inkhel ve zuai tawh tih bakhchu an ram Turkey pawnah a la inkhel ngai lo. Nipui bazar laia an lakluh striker hian goal 16 khungin 'beisei aiin a hriam' tlat.

Lille hian an neihsa Victor Osimhen chu Napoli lakah an chan a, a hmunruak luah turin Jonathan David an lalut. Canadian rawlthar hian Yilmaz kiangah thil tam tak a zir a, a season hmasa bera league goal 13 a khung hi a chhe lo hle.

Tun season Ligue 1 title la tur khan player hrang hrang 21 chauh an chhawr, club dang zawng aiin player an chhawr tlem. Galtier naute hian league lama hlawhtlinna an chan bakah Europa League knockout stage an inpet tling bawk - season tharah chuan Champions League an khel ang.

A phena mi pawimawh
Player an pawimawh, coach pawh mawh­phurtu an ni - anni pahnih phenah hian mi pawimawh an awm; a hming chu Luis Campos a ni. Lille Sporting Director hi an hlawhtlin theih nana sulsutu pawimawh a ni a, nikum December khan club chhuahsan tawh mah se a hnathawh rah an sang.

Campos hian 2017 khan Lille a zawm, khatih laia an thil tum lian ber chu Cham­pions League khel reng thei tur team din a ni. 2018 a rawn her chhuak a, khawvel hmun hrang hrangah player zawngin a zin kual - mel 240,000 zeta thui a zin!

A tirah 'dream' an nei a, 2019 aṭangin a hlawhtlinna an hmu ṭan. Season sarih an khelh phak loh hnuah UCL khel turin an inpet kai a, an player neih ṭhate chelh thei lo mah se an phu tawk aia to zawk mahin an hralh thei zel chu Campos fakawmna a ni.

Tun hnai season hnih chhung chauh pawhin - Nicolas Pepe, Victor Osimhen, Thiago Mendes, Gabriel leh Rafael Leao te hralhna aṭangin pound maktaduai 204 chuang an lalut thei, an club player man to pariat zinga panga chu tun hnaia an hralh zinga mi vek an ni hial. Lille captain Fonte chuan, "Kumin chauh a ni lo, tun hnai kum hnih liam ta vel aṭanga lak khawm kan ni. Luis Campos khan min remkhawm a ni ber, ani bakah hian khatih laia chairman Marc Ingla kha sawi hmaih theih an ni lo," a ti.

Club neitu inthlak vangin Campos hian a hna a chawlhsan. AC Monaco sporting director hlui hi tunah chuan hnathawh bik nei loin a awm mek; season tharah chuan European club lian tam takin an tana hnathawk turin an duh dawn tih a chiang.

Champion kalkawng
Lille hian season bul an ṭan fuh hle, an match hmasa pakua aṭangin vawi nga hnehna an chang - match 10 thleng khan tlawm an nei lo. An elpui PSG erawhin season an ṭan tlai hret a, an league match hmasa pahnihah an tlawm nghal.

Fonte chuan, "Kum thum liam ta kha he hmunah hian ka kal, khatih hunlai khan kan champion chu ka ring nghal bik lo. Mahse, club kalphung a fuh a, tun season kan ṭan dawn meuh kha chuan nomawi kan chawi thei ang tih hi 100%-in ka ring tawh.

"Position tinah player ṭha tak pahnih kan nei thei zel, player senior tlemte karah tleirawl thaza leh theihna nei sang tak tak kan awm khawm a, a bul kan ṭan fuh bakah ngelnghet taka kan kal thei kha vanneihna a ni," tiin a sawi.

April 3 kha a ni a, Paris St-Germain leh Lille te point hmuhzat chu 63 ve ve a ni. Club pahnih hi Paris khawpuiah an intawng a, mi tam zawk rin dan chuan PSG hi an chak ang a, an nomawi humhim turin a chung berah an awm chhunzawm ang, tih a ni. Mahse, Parc des Princes ngei maiah kum 20 mi Jonathan David goal khat hmangin Lille hi 1-0 in an chak a, he inkhelah hian hun tawp dawnah Neymar chu ṭul lo taka a chet vangin hnawhchhuah niin, match hnih atan an hrem zui.

Fonte chuan, "A nihna takah chuan mi zawng zawng deuhthaw khan PSG an chak an ring, kan chak ringtu chu keimahni leh min ṭantute chauh an ni. Paris club kan luhchhuah theih avang khan inrintawkna kan neih belh a, kha inkhel khan hmun pawimawh bik a chang," a ti.