UCL final thleng turin Porto an inpeih

UEFA Champions League final chu May 29, Inrinni zan dar 12:30 ah khelh a ni dawn a, Estadio do Dragao-ah Manchester City leh Chelsea te an inkhel ang. Inkhelhna tur hmun hi FC Porto khelmual a ni a, final thleng turin Porto khawpui an inpeih tawh.

FC Porto president Jorge Nuno Pinto da Costa chuan, "Portugal-a inelna an nghah theih chhan chu UEFA-in Portuguese Football Federation an dahsan vang a ni. Portuguese Football Fede­ration-in FC Porto an hre chiang a, UEFA ngenna an tih hlawhtlinsak," tiin inelna thleng tura an inpeih thu a sawi.

Turkey aiah Portugal
Season liam ta khan Champions League final kha Instanbul-ah khelh tura ruahmanna siam a ni a, amaherawhchu Covid-19 vangin Portugal-in a thleng. Bayern Munich-in PSG hneha nomawi an chawina hmun kha Benfica khelmual Estádio da Luz a ni.

Tun season final khelhna turin Istanbul thlan nawn a ni a, semifinal khelh zawh thlengin sawn a la ni lo. Amaherawhchu UK sorkar-in a ram mipuite Covid-19 vangin Turkey-ah zin an phal lo.

UEFA-in final-ah entu awm ngei se an duh avangin Wembley Stadium-a khelh te an ngaihtuah hman a, mahse Portugal-a khelh an thlang ta zawk. Season liam ta khan Benfica-ah final khelh a nih tawh avangin tun season-ah Porto khelmual an thlang ta thung.

UEFA president Aleksander Ceferin chuan, "UEFA leh Cham­pions League pui turin Portugal kan ngen a, kan ngenna min tih hlawhtlinsak avangin FPF leh Portuguese sorkar chungah kan lawm hle a ni," tiin a sawi.

Engtin zel?
Portuguese sorkar chuan sta­dium-a leng zat 33% emaw 16,500 aia tam lo emaw inkhel entu awm an phal. Final khel tur Man City leh Chelsea ten ticket 12,000 an insem dawn.

Inkhel en turte hi coronavirus lakah an fihlim ngei tih hriat nan 'negative' an ni tih finfiahna an neih a ngai. Mipui vantlang tan 1,700 hralh a ni bawk ang.

Final-ah hian referee tur hian Spanish mi Antonio Miguel Mateu Lahoz ruat a ni a, kum 44 mi Antonio hi Euro 2020 ham tur zingah tel a ni. Team pahnih hian matchday squad-ah player 23 an telh thei a, substitution panga a siam theih. Extra time an khel a nih chuan player paruk a thlak theih thung ang.