Bundesliga Player of the year Haaland

Borussia Dortmund striker Erling Haaland chu Bundesliga Player of the Year atan thlan a ni a, Norwegian striker hian league match 28 aṭangin goal 27 a khung bakah assists vawi riat a nei a ni.

Kum 20 mi Haaland chuan ,"Bundesliga Player of the Year atana thlan ka nih hi ka inchhuang hle. He chawi­mawina hi keima tan chauh a ni lo a, Borussia Dortmund chhungkua tan a ni a, kan vai thawhrah a ni," tiin twitter-ah a ziak.

Chawimawina hi mipui vote aṭanga lak a ni a, Haaland hi player ṭha tak ni mah se Robert Lewandowski-a chet ṭhat kuma a dawn avangin sawisel a hlawh hle.

Haaland-a record
Erling Braut Haaland hian nikum January thla khan Borussia Dortmund hi Red Bull Salzburg aṭangin a zawm a, league-ah match 15 chauh khel hman mah se goal 13 a khung hman.

Kumin hi season tluana a khelh vawi khatna a ni a, league match 28 aṭangin goal 27 a khung a, inelna hrang hrangah match 41 khelin goal 41 a khung. Haaland hian Borussia Dortmund hi DFB Pokal-ah a champion pui a, Champions League-ah quarterfinal thlenpuiin Bundesliga-ah pathumna an ni a, season tharah Champions league an khel dawn.

A phu lo!
Norwegian striker Haaland hian DF Pokal-ah Dortmund champion pui mah se a lawmman dawn hi Bundesliga Player of the Year a nih miau avangin league-a an khelh dan chu a tehfung ni awm tak a ni.

Bundesliga aṭanga hming pakhat chauh thur chhuah tur a nih chuan Robert Lewandowski aia phu an awm lo a, khawvel pum huap anga player of the season thlan tur pawh ni se Lewy hi a phu pawl tak a ni ngei ang.

Lewy hian kum 49 liam taa Gerd Muller-a record siam tawh chu a khum a, season khat chhungin league match 29 lekah goal 41 a khung. Bundesliga ringawta Lewy goal khung zat hi inelna hrang hranga Haaland-a goal khung zat nen a intluk chauh. Goal khung tam lamah Haaland hian Lewandowski bakah hian goal 28 khungtu Eintrancht Frankfurt striker Andre Silva a tluk lo bawk.

Football-ah asssist ngaih pawimawh tel a ni a, Bayern Munich forward Thomas Muller-a'n assist vawi 18 neiin ṭhiante goal khung tur a siamsak hnem ber. Hetihlai hian Haaland erawhin assist vawi ruk a nei a, 20-na ni pha chauhin assist vawi sarih neitu Lewy a la tluk lo cheu.

Engtin zel?
Bundesliga-ah Bayern Munich-in inelna an thunun a, tun season-ah a zawna a vawi kua nan an champion. Bavarians-in league an thunun theih chhan hi player ṭha an kawl tam vang chu a tih theih a, chutihrualin player ṭha rual zingah Lewy hi a langsar fal nalh.

Mipui thlan a nih miau avangin Bundesliga thuneitute lamin tih theih an nei lo a, vote hmu sang ber an pek mai kha an tih tur chu a ni. Haaland hian twitter-ah thlalak leh lawmthu sawina a ziak.

Mak ang reng tak erawh Bundesliga wesbite-in nimin thleng khan an tarlang lo a, Bundesliga Player of the Year atana mipui thlan hi an chhuang bik lo niin a lang.