Suns lakah Lakers an chak
Los Angeles Lakers chuan holam taka season hman liam mai an tum bik lo. Nimin zing inkhelah Lakers hian Phoenix Suns 109-102 in an hneh a, NBA playoff inkhel kal laiah beisei an la nei chhunzawm zel.
Game 1 inkhelah Suns lamin hnehna an chang a, game 2-ah Lakers an chak ve leh tak avangin best of seven series khelh turah team pahnih hi 1-1 in an inhnehtawk mek. May 28, Zirtawpni zingah game 3 an khel ang.
Nimin zing inkhel hmuhnawm takah Lakers tan Anthony Davis-a'n point 34 a nei a, an thiampuipa LeBron James chuan point 23 ngawt nei bawkin an thawh hlawk dun hle - season hmasa ang khan player pahnih hian champion pui an tum leh dawn.
Davis chuan, "Inkhel pawimawhah theihtawp chhuahin ka bei a, kei ka chet ṭhat loh chuan team tan a pawi thei tih rilrua nei chungin ka inlan. LeBron nen season hmasa aṭangin kan in man hle a, khatiang kha kan hmu chho leh turah ka ngai," a ti.
Lakers tan Davis leh LeBron hi innghahna tham an ni, season hmasa lamah pawh an champion pui hial. Tun season-ah erawh hliam vangin an buai a, an inkhel dun tam tawk lo, playoff inkhel pawimawh lai taka an inkawp thei hi club tan chanchin lawmawm bik a ni ang.
Nimin zing inkhel dangah Dallas Mavericks chuan Luka Doncic-a point 39 hmangin Los Angeles Clippers chu 127-121 in an hneh. Tun hnaiah Doncic a khel ṭha thei hle, a match hnuhnung pahnihah point 30 a nei tling thei.
Champion tura rinkai Brooklyn Nets an kal fawr zel. Kevin Durant-a point 26 neih hmangin Nets hian Boston Celtics 130-108 in an hneh a, Eastern Conference playoff series-ah 2-0 in hma an hruai - tlang turin an dinhmun an siamṭha.
NBA Playoff
Vawiin Inkhel Tur
New York Knicks 05:00 AM Atlanta Hawks
Utah Jazz 07:30 AM Memphis Grizzlies
May 28, Zirtawpni
Miami Heat 05:00 AM Milwaukee Bucks
Los Angeles Lakers 07:30 AM Phoenix Suns
Nimin Inkhel Results
Los Angeles Clippers 121 - 127 Dallas Mavericks
(Dallas lamin series-ah 2-0 in hma an hruai)
Phoenix Suns 102 - 109 Los Angeles Lakers
(Series-ah 1-1 in an inhnehtawk mek)
Brooklyn Nets 130 - 108 Boston Celtics
(Nets lamin series-ah 2-0 in hma an hruai)
Denver Nuggets 128 - 109 Portland Trail Blazers
(Series-ah 1-1 in an inhnehtawk mek)