Man United-in Keeper Tom Heaton la dawn

Manchester United chuan an academy chhuak Tom Heaton chu Aston Villa aṭanga la lut turin inremna a nei tawh. Kum 35 mi Heaton hi season tawpah a contract a zo dawn a, Dean Henderson leh David de Gea te thachhang dawl turin Old Trafford a pan ang.

Man United third keeper Sergio Romero contract a tawp dawn a, Argentine keeper hian contract a pawtsei dawn lo. Fourth keeper Lee Grant pawh coaching staff-a awm turin sawi a ni bawk.

Heaton hian 2019-20 season khan Burnley aṭangin Aston Villa a zawm a, match 20-ah a inlan. Amaherawhchu Villa-in Emiliano Martinez an lakluh hnuah khelhna hmun a chang tawh lo.

Spanish keeper David de Gea chu Jose Mourinho hnung zuiin AS Roma a pan dawn tih thawm a awm a, thuthang tam mah se tun dinhmun erawh club pahnihten inbiakna mumal an la nei lo.