Barca, Juve leh Real hma hun a thim?

European football-a thuneitu sang ber UEFA chuan European Super League hmanga football khawvel nghawrnghingtu club-te hremna tur a ngaihtuah ṭan.

UEFA hian ESL aṭanga la inhnukdawk ve lo Barcelona, Juventus leh Real Madrid-te hrem dan tur a ngaihtuah ṭan thu hi a puang a, club pathum hmabak a êng lo hle.

ESL-ah hian a tirah tak chuan club 12 an tel a, mahse, fan-ten an dodal nasat em avangin Arsenal, Chelsea, Liverpool, Manchester City, Manchester United, Tottenham Hotspur, AC Milan, Inter Milan leh Atletico Madrid-te chu an inhnukdawk.

European football-a club thiltithei tak Real, Barcelona leh Juventus erawh tun thlengin an la inhnukdawk ve duh lo a, UEFA a che dawn ta.

ESL chu
April 2021 khan European Super League khelh a nih tur thu puan a ni a, Champions League elpui tur inelnaah hian inelna dintu club 12 leh an sawm leh tur pathumte chu tel chiang sa an ni a, qualifying paltlang club panga an tel bawk ang.

ESL ruahman ang chuan inelna hi kar laihawlah (mid-week) neih ṭhin tur a ni a, August-ah inelna khelh ṭan tur a ni. Club 20-te hi group pahnihah club 10 ve ve awmin an ṭhen hrang ang a, home & away in group stage match chu khelh tur a ni.

Group pahniha a ti ṭha pathum ve vein quarterfinal an lut ang a, hmun ruak pahnih la awm chu group pahniha 4-na leh 5-na ve ve ten playoff (double leg) hmangin an zawng ang.

Quarterfinal aṭangin Champions League kalphung angin an kal ang a, home & away hmangin a thiam pariatten semifinal lut tur an zawng ang a, final hi neutral venue-ah single leg-a khelh tur a ni.

Mahse maw...
ESL-ah hian a tirah club 12 an tel a, a bak pathum pawh chiang sa angah ngaih a ni - pawisa pawh a tam nghal a, American bank JP Morgan chuan he inelna hi a thlen theih nan dollar tluklehdingawn nga pek an inhuam.

European club liante chuan he inelna buatsaih an tum chhan hi Covid-19 in club liante a nghawng nasat vang niin an sawi a, hripui leng avanga an sum hloh tam tak neih let leh dan an ngaihtuah a ni ber. A thim zawnga thlir erawh chuan ESL dintu club 12-te hian an hlawkna tur chauh an ngaihtuah tiin a sawi theih a, club 15 relegate ve thei lo tura an ruahmannate chu sawiselna langsar zual a ni.

ESL bul ṭantu zinga tel tur anga ngaih sa Paris Saint-Germain, Bayern Munich leh Borussia Dortmund-ten mipui lawm lohna an hmuh hmaih loh a, ESL an zawm ve loh tur thu an puang zui.

Mangṭha ESL
Kum 1998 aṭang khan ESL hi kalpui tum a lo ni tawh a, kumin April 18-ah din a nih tur thu an puang leh a, mahse kar khat pawh a tlin hma emin a tawp zui.

ESL dintu zinga mi Arsenal, Chelsea, Liverpool, Manchester City, Manchester United, Tottenham Hotspur, AC Milan, Inter Milan leh Atletico Madrid-ten fans lungawi lohna an hmuh hmaih lo a, an inhnukdawk nghal. Mahse, club dang pakua zet an inhnukdawk chungin Barca, Real leh Juve erawh an ṭang tlat a, tun thlengin an la inhnukdawk lo - an tumah an chiang tlat.

ESL chairman leh Real Madrid president Florentino Perez phei chuan, "Kan la chawl rih mai a ni," tiin ESL-a la tawp loh thu a sawi fan a, club lian pathumin UEFA leh FIFA an hlau lo.

A sawhkhawk
Fan-ten ESL dodal lo se UEFA sum hloh tur chu sawia fiah mai chi pawh a ni lo - tam tak a ni. Hei hi European football thuneitute pawhin an hai lo a, an lamah fans an ṭan miau avangin an huaisen hle.

May thlatir lam khan UEFA chuan a tira inhnukdawk club pakuate chu inhnukdawk mah se hremna an pe a, euro maktaduai 15 thawhkhawm turin tih an ni a, he sum hi Europe khawmualpuia naupang leh grassroot football hmasawn nana hman tur a ni.

He hremna chungchangah hian United co-chairman Joel Glazer chuan pawisa chu club sum ni lo, anmahni sum aṭanga an pek tur thu a sawi a, Arsenal neitu Kroenke Sports & Entertainment leh Spurs pawhin club sum lakluh aṭanga sum an chawi loh tur thu an sawi.

Hei mai hi a ni lo UEFA inelna aṭanga an sum hmuh tur 5% chu 2023-24 season aṭanga ṭanin season khat atan hrensak an ni ang a, UEFA hriatpui ni lo inelna dang an buatsaih leh dawn a nih chuan euro maktaduai 100 an chawi bawk ang.

Nghing ve lo!
A tira bul an ṭanpuiten an tawpsan vek chungin Barca, Real leh Juve an nghing ve duh lo a, Florentino Perez phei chuan tun hnaiah khan club 12-te chuan contract an ziah vek avangin ESL an chhuahsan ngawt theih loh thu a la sawi cheu.

European football-a thuneitu sang berin ngawih reng an tum lo. UEFA chuan club pathum hremna tur an ngaihtuah thu an puang a, club pakuate an hremna ngaihtuahin hremna hi a nep hauh lo ang.

UEFA chuan, "Super League chungchang UEFA ethics & disciplinary inspector-ten an chhuina kal zelah Real Madrid, Barcelona leh Juventus-te chu UEFA inkkaihhruaina dan bawhchhiat chungchanga an thubuai chu ngaihtuah a ni dawn a, hmalak zel dan tur chu puanzar a ni thuai ang," an ti.

He thu buatsaih a nih thleng hian UEFA lam chuan thuthar an la nei leh rih lo a, he thuziak i chhiar meuh chuan club lian pathum hrem an nih dan tur hi a chhuak tawh mai thei.