England: Southgate-a'n a duhthlan a sawifiah
Euro 2020 atan England boss Graeth Southgate-a'n player 33 hming a puang a, player 26 chiah Euro-ah hruai theih an nih avangin final squad hi June 1-ah puan leh tur a ni.
Southgate hian a tirah player 26 hming hi puan nghal a tum a, mahse, nizan khan Manchester United chuan Europa League final an khel a, Manchester City leh Chelsea-ten Inrinni zanah Champions League final an la khel dawn bawk.
England squad-ah European final khel tur hi player 12 ngawt an awm a, hei bakah hian hliam dam kawr an awm nual bawk - harsatna thleng thut thei reng a la nih avangin Southgate hian player 33 koh phawt a thlang ta zawk a ni.
33 phawt
Southgate chuan, "European final khel tur player 12 kan nei a, inhliam neuh neuh, an dinhmun kan hriatchian loh an awm nual bawk. Hei vang hian hun kan mamawhin kan hria a, hun kan neih deuh chuan thutlukna pawh siam kan awlsam ang.
"Player 26 hming puan phawt hi chu kan duh ngei a, mahse, kan duh dan angin thil a tih theih ta bik loh. Ni sarih hnuah chuan kan duh ang thilte hriain thil thleng theite pawh kan hre tawh ang chu," a ti.
Southgate hian player pasarih a la chhawk leh a ngai dawn tihna a ni a, Euro 2020-ah Three Lions hi group D-ah an awm a, Croatia, Scotland leh Czech Republic-te nen last 16 luh an inchuh ang.
Player inhliam
Burnley goalkeeper Nick Pope chu inhliam vanga koh loh a ni a, hetihrual hian Liverpool captain Jordan Henderson, Everton striker Dominic Calvert-Lewin, Leeds United midfielder Kalvin Phillips leh United captain Harry Maguire-te chu hliam nei chunga koh an ni.
Leeds chuan dar hliam vanga chawl mek Phillips chu Euro khel tura a dam chian hman tur thu an sawi a, Hendo hi Liverpool league match hnuhnung berah bench-ah a awm a, dam taka Euro khel thei tura ngaih a ni bawk.
Southgate chuan, 'Hliam ṭhenkhat chungchangah hi chuan thil nih dan tak kan hre rih lo hle," a ti a, an tan thutlukna siam thuai a harsat thu a sawi.
Right back pali
Tun hnaia England hausakna tak chu right back a ni a, Southgate-a'n Trent Alexander-Arnold, Kyle Walker, Reece James leh Kieran Trippier-a ko vek a, hei hi sawi hat a tling - an zing aṭang hian pakhat tal chhawk leh tura ngaih a ni.
Mahse, Southgate chuan, "Nangni chuan right back pali in hmu a, kei chuan footballer ṭha tak pali chiah ka hmu. Trippier hi left back-ah a khel thei a, Arnold hi wing back leh midfield-ah a khel thei a, James hi defender pathum zinga a ding lama a khel lai ka hmu tawh a, wing back leh midfield-ah a khel thei bawk - position hrang hranga chhawr theih player hi kan tan an ṭangkai dawn," a ti.
Southgate hi Arnold duh lo anga sawi a ni a, mahse, English coach chuan, "Trent hi ka duh lo angah tam takin an ngai a, mahse, chutiang chu a ni lo. Midfield-ah a khel thei tih ka chiang a, ball a pass thiamin vision a nei ṭha em em bawk. Right back aṭanga playmaker ni thei a ni," a ti a, Arnold-a paih a rinawm ta lo hle.
Rawlthar beiseina
Southgate-a'n ram tana la inlan lo a koh zingah Brighton centre back Ben White leh Everton centre back Ben Godfrey-te an tel a, Baggies keeper Sam Johnstone leh Sheffield United keeper Aaron Ramsdale-te chu ram tana la inlan lo ve bawk an ni.
England coach chuan, "White leh Godfrey-te hi defender ṭhangduang tak an ni a, an insiamrem thiamin mawhphurhna pawh a hran pek an ni fo. Keini tan anni hriatchianna remchang a ni a, engtia rei nge kan hnenah an awm dawn kan sawi thei lo a, mahse, an tan chuan tawnhriat ropui tak a ni ang," a ti a, final squad-ah an tel hmel loh.
Southgate-a'n Borussia Dortmund midfielder Jude Bellingham (kum 17), Arsenal midfielder Bukayo Saka (19) leh United forward Mason Greenwood (19) te a ko bawk a, kum 50 mi coach chuan, "Kar khat emaw kar nga pawh, kan hnena an awm chuan an tan tawnhriat ṭha tak a ni dawn. Hnehna chang tur team din kan tum a ni," a ti.
Thutlukna huaisen
Tottenham midfielder Eric Dier chu koh zingah a tel lo a, Southgate chuan, "Dier hi ka squad-a awm turin a inkhel tam tawk lo a, team tana a hnathawh theihte ngaihtuahin ani koh loh hi thil harsa tak a ni," a ti a, Dier chu inbiakna a neihpui thu a sawi bawk.
Everton defender Michael Keane leh Leicester City midfielder James Maddison-te pawh koh an ni lo. Southgate chuan Maddison-a koh loh chhan sawiin, "A khelh duhnaah hian ani aia koh phu zawk an awmin kan hria a ni," a ti a, tun season-a Maddison-a khelh dan thlirin thutlukna awm tak a ni.
Premier League-a match 38-a khelh ṭanga goal 17 khunga assist vawi riat nei thei Patrick Bamford leh hliam vanga match 29 lek khel chunga goal 12 leh assist pali nei thei Danny Ings-te koh an ni lo a, anni pahnih koh an nih lohna erawh sawifiah a harsa ang.
Kane & transfer
England Harry Kane-a'n Tottenham Hotspur chhuahsan a dil a, English striker transfer boruak hian amah mai piahlamah team a nghawng tel hlautu tam tak an awm.
Mahse, Southgate chuan, "Harry-a inpekna hi ka tan buaina a ni ngai lo. England tan tum pakhat a nei a, chu chu Euro nomawi chawi a ni," a ti a, Euro zawhah transfer buaipui ṭhin a nih thu a sawi lang bawk.
Southgate-a fa chuam an tih hial Jordan Pickford-a'n season tawp lamah ngai a awh chho leh a, Everton keeper hi Euro 2020-ah England first choice a nih ngei a rinawm hle.
England Squad 33
Goalkeepers: Dean Henderson (Man Utd), Sam Johnstone (West Brom), Jordan Pickford (Everton), Aaron Ramsdale (Sheff Utd)
Defenders: John Stones (Man City), Luke Shaw (Man Utd), Harry Maguire (Man Utd), Trent Alexander-Arnold (Liverpool), Kyle Walker (Man City), Tyrone Mings (Aston Villa), Reece James (Chelsea), Conor Coady (Wolves), Ben Chilwell (Chelsea), Ben Godfrey (Everton), Kieran Trippier (Atletico Madrid), Ben White (Brighton)
Midfielders: Mason Mount (Chelsea), Declan Rice (West Ham), Jordan Henderson (Liverpool), Jude Bellingham (Borussia Dortmund), Kalvin Phillips (Leeds), Jesse Lingard (Man Utd), James Ward-Prowse (Southampton)
Forwards: Harry Kane (Tottenham), Marcus Rashford (Man Utd), Raheem Sterling (Man City), Dominic Calvert-Lewin (Everton), Phil Foden (Man City), Jack Grealish (Aston Villa), Mason Greenwood (Man Utd), Ollie Watkins (Aston Villa), Jadon Sancho (Borussia Dortmund), Bukayo Saka (Arsenal)