Liverpool-in Konate lakluh tum

Season thara Champions League khel tur Liverpool-in transfer bazar lam an hawi zui a, RB Leipzig defender Ibrahima Konate chu Anfield lama lakluh tumin an dawr mek.

Kum 22 mi Konate contract-ah hian a duh tan pound maktaduai 34-a leichhuah theih a nihna dan a inziak tel a, Liverpool hian lakluh an tum a nih chuan heti zat sum hi insen an huam a ngai ang.

Khawthlang media ṭhenkhat chuan Konate hian medical-a paltlang tawh ang hialin an tarlang a, he thuziak i chhiar meuh chuan an inbe fel tawh hial mai thei.

Liverpool hian an duh a nih chuan Schalke 04 aṭanga loan-a an hawh mek Ozan Kabak chu season tawp rualin a nghetin an lalut thei a, a man hi pound maktaduai 18 niin, a khelh ṭhat dan a zira pek belh tur a ni.

Mahse, Turkey international hian Anfield-a a cham chhungin Jurgen Klopp-a lung a len zo lo a, Kabak hi a ngheta lakluh an tum tak lohah chuan Konate lam hi an hawi ta niin a lang.

Tun season Champions League last 16-ah khan Reds hi RB Leipzig nen an intawng a, Liverpool hian inkhel pahnih belhkhawmah 4-0 in hnehna an chang - Konate erawh match hnihah a inlan lo ve ve.

French centre back, hmabak nei êng tak Konate hian season hman zawh takah khan Leipzig tan inelna hrang hrangah match 21-a khel a, Reds hi a pan a nih chuan Virgil van Dijk leh Joe Gomez-a thachhang dawltuah hman a ni ang.