I hriat ngai loh Novak Djokovic chu

"Ka naupan lai chuan harsatna tam tak ka tawk, tualchhung buaina a awm fo, 1990 bawr kha niin khawsak phung a ti buai hle. Lawng aṭanga an rawn phurh - chhang, bawnghnute, tui in tur leh nitin mamawh dang la tur chuan rei tak kan intlar a ngai ṭhin," tiin Australian Open champion Novak Djokovic chuan a naupan lai chanchin a sawi.

Mi hlawhtling tam tak an awm, an hlawhtlin dan leh kalkawng erawh a inang vek lo. Kumin Australian Open champion Djokovic leh hmeichhe singles champion Sofia Kenin te hian khawvel huapa hlawhtlinna lian chang tur hian an naupan lai leh seilen hun laiin harsatna hrang hrang an lo tawk ve tawh ṭhin.

Novak Djokovic hi Serbia khawpui Belgrade-a piang a ni a, an ram hi tualchhung bakah ram ṭhenawmte nen politics chungchanga buaina nei an nih avangin harsatna tam tak a thleng. Inkalpawhtawnna a ṭha tawk lo a, mipui nun a zalen loin ram zalen dangten awlsam leh nuamsa taka an neih theih chu an tan thil harsa a ni ṭhin.

World number 1 dinhmun luah thar lehtu Djokovic chuan, "Engmah lo mai aṭangin kei leh ka chhungte hi kan rawn chhawr chhuak a, ka thil tawn tawh tam tak aṭang khan hun harsa paltlang dan pawh ka hriat theih phah a ni.

"Harsatna ka tawh khan hlawhtlin duhna leh tumruhna min siamsak a, khang hun hrehawm ka tawn lai ka ngaihtuah let apiang khan chakna ka nei thar leh ṭhin, harsatna liamta zawng zawng kha chakna ka neih theih nana lungphum pawimawh a lo ni reng si," a ti.

Djokovic hian tennis a hun hmasa lamah chuan Grand Slam champion ni turin Roger Federer leh Rafael Nadal te anga taksa lian leh chak ṭha neih ve a châk thu a sawi ṭhin, tunah chuan taksa leh rilru lamah chuan player ṭhain a mamawh ang chu a nei kim tawh.

Grand Slam champion hnem ber Roger Federer-a'n nomawi 20 a chawi tawh a, kum 38 mi a ni tawh. Vawi 19 champion tawh Nadal pawh kum 33 a tling tawh a, an hnunga awm - vawi 17 champion tawh Djokovic hi kum 32 mi a ni thung.

Serbian tlangval chuan, "Nakinah kan sulhnu an lo chhiar let a nga, a ropui ber nih chu ka duh ngei mai. Mahse, tennis season hi a harsa ṭhin, hun rei lote hnuah chuan khawvel hmun hran daiah, court kalphung dangah ka inkhelh leh a ngai dawn.

"Hun rei tak chhung season ṭha takin lo hmang tawh mah ila, tunah chuan inelna liana hlawhtling tur chuan tournament zawng zawng khelh theih a ni tawh lo," a ti. Hard court inelna zawhah hian clay court lamah an inkhel zui leh tawh dawn a ni.

Australian Open bikah chuan vawi riat a champion tawh avangin record nei ṭha ber a ni, amaherawhchu atan clay court chu inkhelh harsatna hmun a ni. A elpui Nadal nen an kum inthlauhna chu kum khat chauh a nih bawk avangin champion hnem ber ni tur chuan hliam nei loa khelh theih a pawimawh dawn.

Roger Federer, Rafael Nadal leh Novak Djokovic ten Grand Slam hnuhnung 13 an chawi vek a, 2016 US Open-a Stan Wawrinka a rawn champion ve zauh tih loh chu player dang tan hun siamsak an ni eih lo.

Kum 26 mi Dominic Thiem-a'n French Open final vawi hnih lut mah se Nadal a ngam lo, tun Australian Open-ah set hnih la thei mah se Djokovic a hneh lo leh bawk; season hmasa khan US Open final-ah player beiseiawm Daniil Medvedev chu Nadal lakah a tlawm bawk.

Austrian tlangval Thiem chuan, "Khawvela tennis player ṭha ber ber pathum te chu vawi khatah an inlar rual a, midang tan champion ve a harsa em em a ni. Grand Slam champion ni tur chuan inelna pakhatah player ṭha pathum zinga pahnih tal hi hneh a ngai ṭhin.

"US Open kha thlirlet ila, tun inelna nen pawh enlet ni ila chuan champion tura kan mamawh chu vanneihna tlemte chauh a ni," a ti. Thiem leh player dang te hian theihna chu an nei ngei mai, mahse inkhel boruak sang leh a pawimawh lai taka holam taka point an hloh zeuh ṭhin chu an tuar rih a ni.

Australian Open hmeichhe singles champion Sofia Kenin chanchinin ngaihven a hlawh. Russia aṭanga beiseina nen United States an pan dan chanchin ngaihnawm chu media lam chawitu ber pakhat a tling, naupan lai aṭanga mi danglam bik a ni tunah chuan khawvel hriat a ni tawh.

Rod Laver Arena-a Garbine Muguruza nen an inkhel kha a hmunah a pa Alexander chuan a en, a nu Svetlana erawh a hlauhthawn nasat em avangin a hmunah a kal ngam lo, Kenin-i pi, a unaunu leh an ui nen in aṭangin final kha an lo en.

Nomawi a chawi hnuah Kenin hian a nu chu phone nghalin, "Tunah hian hun rei tak ka be thei lo che, mahse hnehna changin ka champion tih chu ka rawn sawi duh, ka rawn haw hunah thlamuang takin min kuah thei," tiin a nu a hrilh.

Alexander khan a fanu Kenin hi Moscow a piang ni mah se an naupan laiin US a panpui, khatih hunlai khan Russia-ah mipui an zalen tawk lo a, a fanu theihna nei sang tak chuan a thlen tur ang chen a thlen theih loh a hlauh avangin ram zalen zawkah a hruai, thutlukna a siam tawh zinga fuh ber pawl a ni ngei ang.

Harsatna ka tawh khan hlawhtlin duhna leh tumruhna min siamsak a, khang hun hrehawm ka tawn lai ka ngaihtuah let apiang khan chakna ka nei thar leh ṭhin, harsatna liamta zawng zawng kha chakna ka neih theih nana lungphum pawimawh a lo ni reng si - Novak Djokovic

Maria Sharapova leh Anna Kournikova te inkhel kha ka en ṭhin, kum 17 mi chauh ni chunga Sharapova champion kha ka la hria. An thil tih ang tih ve theih kha ka châk takzet ṭhin, ka suangtuahna hlawhtlin theih nana America rama min pempuitu ka nu leh pa chungah ka lawm - Sofia Kenin