Asian Boxing Championship-ah Mizo nula Bs-i'n final a lut

Asian Boxing Con­federation hnuaia inelna neih lai ASBC Asian Elite Boxing Championship-ah Lalbuatsaihi chuan final a lut. Mizo nula hian Pathianni zan hian final a khel zui dawn a, a chhe berah pawh silver medal a hlawh chhuak dawn tihna a ni.

Dubai, UAE lama India tana feh chhuak zingah hian MC Mary Kom (51kg) pawh a tel. World champion vawi ruk ni tawh hian final a lut a, ani bakah hian hmeichhe boxer dang Sakshi (54kg), Lalbuatsaihi (64kg), Pooja Rani (75kg) leh Anupama (81+kg) ten final an lut.

Inhnek hi Mizote tan pawh live a en theih turin an pe chhuak. YouTube lamah 'AIBA Boxing' chuan live-in an pe chhuak leh dawn a; inhnek hi a indawta kalpui a nih ṭhin avangin Mizo nula inlan hun tur dar zat tak erawh sawi nghal theih a ni lo.

Bs-i a chungnung
Nilaini zan semifinal 64kg huangah Bs-i hian Kuwait nula Noura Almutairi chu round hnihna lekah a hneh. Inhnek tir lam aṭangin kawng tinrengah Tuithiang boxer hi a chungnung a, referee-in inhnek a titawp - tawnhriat nei tlem zawk Almutairi tan tih theih dang a awm lo.

Vanglaini zawhna chhangin Bs-i chuan, "Min ṭawngṭai puitute zarah hnehna ka chang thei. Theihtawp ka chhuah a, India leh Mizoram tan a sang thei ang ber thlen ka tum," a ti a, final atan pawh beisei a neih thu a sawi tel bawk.

Final-ah hian AIBA Women’s World Boxing Championships bronze medal la tawh Milana Safronova nen an in­hmachhawn leh dawn a, Kazakhstan boxer hi tawnhriat nei ṭha leh theihna sang a nih avangin a hautak dawn.

Tun hma chuan International Boxing Association (AIBA) hnuaiah hian lawmman atan pawisa a tel ngai lo. Tun ṭumah erawh lawmman a awm tawh dawn, pakhatna $10000 (Rs. 7,24,563), silver medal $5000 (Rs. 3,62,281) leh bronze medal la tan $2500 (Rs. 1,81,140) a ni dawn.

Mary Kom hoin
India boxer chhuanvawr, 54kg huanga inlan MC Mary Kom tan harsatna a awm lo. Tokyo Olympic khel tur hian Mongolia nula Lutsaikhan Altantsetseg chu 4-1 in a sawp a, final a inhnuk thleng.

Mary Kom hian final-ah AIBA Women’s World champion vawi hnih ni tawh Nazym Kyzaiba a hmachhawn leh dawn. Kazakhstan boxer hi a hneh a nih chuan Kom hian Asian title paruk a lak tlinna a ni chiah nghal ang.

Kum 38 mi Mary Kom chuan, "Ka khelh ṭhat ber ṭum chu a ni lo, mahse, ASBC Asian Elite Boxing Championship final ka lut thei hi chanchin ṭha tak a ni. Hri leng vangin inelna kan hmachhawn mumal lohna a rei tawh a, chumi hnua inkhelh leh chu a awlsam lo.

"Olympic hmain inbuatsaihna hun a chawpchilh hle a, hun tepter tak kara result ṭha neih theih hi a lawmawm takzet a ni," a ti a, Manipuri boxer hian Japan khawpuia inelna lian chu a hmathlir a nih thu a sawi tel bawk.