French Open : Intawng thei zingah - Nadal, Federer leh Djokovic

Tennis inelna lian French Open 2021 chu Pathianni aṭanga khelh ṭan a ni dawn a, mipa singles huangah Rafael Nadal, Roger Federer leh Novak Djokovic te chu final hmaa intawng thei tura dah an ni.

Champion lai Nadal-a'n a nomawi a humhim a nih chuan Federer (20 titles) khumin Grand Slam nomawi ngah ber a ni dawn. Spanish star hi world number 3 a nih avangin seeded pathumna pek a ni - Djokovic leh Daniil Medvedev te hnungah a awm.

Nadal, Federer leh Djokovic te hian an ropuina an la hum thei dawn nge, player chhuak thar ṭha zawk ten rorelna an chang ve tawh dawn tih chu a takin a lang dawn. Kar hnih chhung chu tennis inelna hmuhnawm bik Paris khawpui aṭangin an chhawp chhuak leh ang.

Entu an awm dawn
Hri leng vangin France khawpuiah in­khuahkhirhna kalpui mek a la ni a, mahse French Open hi nitin a hmunah entu an awm thei dawn tho a ni. Season hmasa khan ni khatah mi 1000 zelin an en thei a, kuminah chuan mi 5,388 an awm thei tawh dawn a ni.

Entu hi hmun khata awmkhawm tur an ni dawn lo, hlawm hrang hrang parukah an ṭhen hrang leh ang. June 9 hnu lamah chuan mipui an zalen deuh tura ngaih a ni a, hetiang a nih chuan Court Philippe Chatrier leh Court Suzanne Lenglen-ah te mi 5,000 an lut thei dawn tihna a ni.

Tun hma lama an tih ngai loh ang takin zan inkhel a awm dawn. Zan match bik hi Court Philippe Chatrier-ah khelh a ni dawn a, mahse June 9 hma lam chuan zanah 'curfew' a nih dawn avangin entu an awm a rem dawn lo.

French Open hi hri leng vangin a tira ruahman sa aiin kar khatin an khel ṭan tlai, nikum pawh khan May thlaa khelh tur ni mah se coronavirus vang bawk hian September thlaah an lo sawn tawh bawk, nikum ai chuan kuminah hian hriin a tibuai nep ta hle.

En hlawh tur Nadal
June 3 hian Nadal-a'n kum 35 a tling dawn, inelna neih laklawh laiin a birthday a thleng dawn tihna a ni. A kum chauh en chuan Nadal hi uaithla lam tawh tura ngaih a ni, French Open-ah erawh player dang zawng zawngin Nadal hmachawn hi an chak lo ang.

Nadal hian a match hmasa ber atan Pathianni hian Alexei Popyrin a hmachhawn dawn a, chak tura rin a ni. Nadal hi a chak tluang zel a nih chuan semifinal-ah Djokovic nen an inhmachhawn thei dawn - player pahnih kalkawngah hian Federer a awm bawk.

Mipui hmuh chak ber chu Nadal a ni leh dawn, vawi 13 champion tawh Nadal chuan, "Tumah hneh theih loh an awm lo, tun hnaiah Monte Carlo leh Madrid khawpuiah ka chak lo, khatiang khan Roland Garros-ah chuan a thlen loh hram ka duh.

"Paris khawpui hi ka tan chuan hmun hlu bik a ni a, kum 10 liam ta kha tun hun tur hi ka ngaihtuah phak lo. Kum 35 vel bawra inkhelh chu thil awlsam a ni tawh lo. Tun ṭumah hian tumah rinkai ber an awm bik lo, a khel ṭha ber an dingchang ang," a ti.

Federer inlan dawn
Federer hi season hmasa khan hliam vangin Paris khawpuiah hian a inlan lo, kuminah hian seeded pariatna pek a ni a, player ṭha tak ni mah se a vanglai pawhin clay court-a inkhelh a harsat ṭhin, kuminah hian beisei san ngam a har.

Hliam vangin Federer hi tun hnaiah a inkhel tam tawk lo - French Open a khelh chhan pawh Wimbledon atana inbuatsaih nan a duh vang niin a ngaih theih. Swiss star hian a ngaih pawimawh ber chu grass court inelna lian a ni leh dawn, chumi atan chuan inkhelh tam a mamawh.

Kum 39 mi Federer chuan, "Miten ka lakah eng ang beiseina nge an neih chu ka hre lo, mahse kei chuan ka theihna sang ber ka hlan ang. Grand Slam title lak hnem ngawr ngawr hi ka tum a ni lo a, nuamti taka tennis khelh hi ka duh ber a ni.

"A nihna takah chuan major title 15 lak tlin kha chu a theih mai, a hnu lam erawh vanneih vang a ni tawh. Rafa leh Novak te hian hmabak eng tak an la nei a, engtik niah emaw chuan kei aiin nomawi an la chawi hnem ang," a ti.

Player beiseiawm?World number 2 Medvedev hi seeded pahnihna pek a ni a, Russian tlangval hian French Open hi vawi nga khel tawhin chak ni hmel a la hmu miah lo! A ranking sang viau mah se Paris khawpuiah bik chuan beisei san a har.

Dominic Thiem-a'n 2018 leh 2019 khan final a lut, mahse Nadal a ngam lo. Austrian tlangval hian US Open lamah major title a la thei tih a takin a lantir tawh a, kuminah hian seeded palina niin player lian pathum elphak tura ngaih a ni.

Grand Slam khelh dawnin Alexander Zverev hi player sawi hlawh a ni ve ziah, mahse beisei a phak ngai lo. German tlangval hian Madrid Open nomawi a chawi a, clay court hi a inkhelh thiamna hmun a nih bawk avangin beisei a nei sang ang.

Monte Carlo Masters champion Stefanos Tsitsipas pawh en bik tur zinga mi a ni dawn. Greek player hian Nadal, Federer leh Djokovic te elphak turin theihna a nei, kum 22 mi ni tawhin a puitling tawh - chhuanlam atan 'naupang' hman chi a ni tawh dawn lo.

Hmeichhe lam...
Champion lai Iga Swiatek-i'n a match hmasa berah Kaja Juvan a hmachhawn dawn a, nikuma pahnihna Sofia Kenin chuan 2017 champion Jelena Ostapenko a tum ang - a hmuhnawm nghal dawn.

Serena Williams chuan Grand Slam title 24-na a beisei leh dawn, American star hian Margaret Court-i record (24 titles) a um rei ta hle. Major tournament-ah final a khelh hnuhnung pathumah a chak lo vek, tun ṭumah pawh rin thiam a harsa.

World number 1 leh seeded pakhatna ni bawk Ashleigh Barty chu rin hlawh ber a ni dawn, Australian player dal thei tur zingah Swiatek a tel ang. Swiatek hian Italian Open title lain inbuatsaihna a nei ṭha tawk hle.

Hmeichhe world number 3 Simona Halep chu chawn hliam vangin a inlan thei dawn lo. Clay court-a inkhel thiam tak Halep hi Italian Open khelh laiin a inhliam a, tunah a la dam lo. July thlaa khelh tur Wimbledon atan erawh a dam hman beisei a ni.