Rashford-a'n hmuhsitna a tawk

Manchester United forward Marcus Rashford chuan Europa League final-a Villarreal-a ngam loh hnuin vun rawng avanga hmuhsitna a tawh nasat thu a sawi a, sawi zui a hlawh hle.

Rashford chuan, "Ka social media account-a ka vun rawng vanga hmuh­sitna ka tawh hi a tlem berah 70 tal chu a ni ang," a ti a, social media lamah beih nasat a nih thu a sawi.

English forward chuan sawi chhunzawmin, "Rilru hrehawm taka ka awm laia ka hrehawmna belhchhah tum zawng zawngte, in hmalaknaah duhsakna ka hlan a che u," a ti zui sak.

Chi inthliarna lam do­daltu pawl, Kick It Out-a head of player engagement Troy Townsend chuan, "Europa League final-a an tlawm avang maia Rashford leh Manchester United player-ten sawiselna an tawh dan hi a lawmawm loh a, pawm dam theih a ni lo.

"Online kaltlanga inhmuhsitna titawp tur hian hnathawh tur tam tak a la awm tih kan hria a, social media company-te nen kan indawr tawn zel ang. Online kaltlanga inhmuhsitna hi a tawp a ngai a, thil titheitute pawh an chet a ngai a ni," a ti.

Rashford chuan amah deutu zingah chhiarkawp zirtirtu pawh a awm thu a sawi a, kum 23 mi forward chuan, "Naupangte zirtirtu a ni a, zalen taka midang hmusit theiah a inngai a ni," a ti a, a lawm lo hle.

UK Department for Education chuan he zirtirtu hi an chhui dawn a, Greater Manchester Police-te chuan United player-te hmuhsitna chu UK chauh ni loin khawvel hmun hrang hrang aṭanga lut a nih thu an sawi bawk.

Facebook leh twitter lam pawhin thil thleng chu an dem thu an sawi a, chi inthliarna lam hawi thil thleng leh thleng theite thlitfim kawngah theihtawp chhuaha hma an lak zel thu an sawi.