Duh loh hnu ngaia lungleng Spurs!

Club lian chetin Tottenham Hotspur an che a, khawvela coach langsar pawl Jose Mourinho chu season laihawlah khan an beisei ang result a pek theih loh avangin an ban.

Mourinho an ban hnuah Spurs-in coach thar an zawng nghal a, mahse, an inhmuh len angin khawvel coach langsar ten London club hi an lo hmu lo.

A tawpah Spurs-in 'Big Six' huang chhunga seng luttu Mauricio Pochettino lam bawk an hawi a, London club hian an coach hlui hi an hnena kir leh turin an thlem!

Argentine coach hian Spurs aia club lian leh hausa zawk Paris St-Germain a enkawl mek a, France khawpui Paris-ah kum khat cham turin contract-a la nei.

Di hlui
Spurs hian engvangin nge Poch hi laklet leh an duh? tih chu zawhna awm thei langsar tak a ni a, a chhanna awlsam ber chu an inhmuh len anga coach larten an hmuh ve loh vang a ni ber.

Spurs hian Mourinho an ban hnuah RB Leipzig boss Julian Nagelsmann an dawr nia sawi a ni a, mahse, German coach ṭhangduang hian Bayern Munich enkawl a thlang zawk.

Ajax boss Erik ten Hag pawh an biak thu sawi a ni a, mahse, Ten Hag pawh hian London-a input luh ai chuan Dutch league lama cham chhunzawm a thlang a, Spurs-in an sawm lai rengin Ajax-ah kum 2023 thleng cham turin contract thar a ziak.

Leicester City boss Brendan Rodgers hming pawh a ri ring viau a, mahse, Liverpool boss hlui hian FA Cup-a a champion pui tak Leicester City-a cham a thlang.

Lo kir leh rawh...
Spurs-in an duh ang coach an lalut thei lo a, Leipzig boss hlui Ralf Rangnick hming thlengin a ri hman - a tawpah erawh mualpho taka an ban hnu Poch-a lam an hawi a, an kal zel dan tur hriatthiam a har hle.

Kum 49 mi coach hian January 2021 khan PSG-a zawm a, a season hmasa berah Coupe de France leh Trophee des Champions nomawi a chawi a, mahse PSG-in an ta neih tawh Ligue 1 nomawi erawh chawi thei loin Lille lakah a chan.

PSG-in season kua chhunga a vawi hnih nan league nomawi an chawi lo a, Champions League semifinal-ah Manchester City an ngam lo bawk - sum tam tak hmangtu PSG-ah hian Poch-a'n a contract a hmang zo kher ang em, tih zawhna a awm.

Hei hi Spurs chuan remchangah lak an tum niin a lang a, Champions League 2019 final-a luhpuitu an coach hi a lung tih len leh an tum mek. PSG nen official taka inbiakna erawh an la nei lo.

Lung ti lengtu
April 2020 khan Pochettino-a'n Spurs-ah kir leh ngei a duh thu a lo sawi tawh a, hetihlaia a thusawi hian London club hi beiseina thar a siamsak niin a lang.

Poch chuan, "Zinkawng hlimawm tak, a tawp dan erawh kan beisei loh anga tawp ta a ni a, mahse, ka thinlungah hian chiang taka ka hriat chu, kan intawng leh ang tih hi a ni.

"Spurs ka chhuahsan aṭang khan ka duhthusam ber chu engtikniah emaw he hmuna kir leh hi a ni a, kan hnathawh tawh, kan thawh zawh tak loh kha thawh chhunzawm leh ka duh a ni.

"Premier League leh Champions League-ah nomawi kan chawi teuh em em a, fan-te ka chunga an ṭhat em avangin kir leh hi ka chak ngawih ngawih. Chu chu kum nga emaw, kum 10 hnu pawh a ni mai thei a, ka thih hmaa Spurs enkawl leh ka duh a ni," a ti!

Mahse maw...
Poch-a'n Spurs-a kir leh a duh thu a sawi lai hian club-a nei loh lai a ni a, tunah chuan European football-a club langsar ber pawl PSG-a enkawl mek.

Hei mai a ni lo - Spurs-ah hian kir ta se, a hna hmasa tur chu tun hnaia chhuah duh Harry Kane thlem a ni dawn a, hei hi London club-in kir tura an duh chhan lian tak zingah pawh a telin a rinawm.

Mahse, Poch chian PSG-ah Neymar, Kylian Mbappe leh Ángel Di María-te ho a nei a, chutihlaia Kane thlem tura England-a kir chu a tan thil châkawm tak a ni kher lo ang.

Kane hian nomawi chawi a duh avangin Spurs hi chhuahsan a duh a, club chairman Daniel Levy nen tlang taka indawr a duh thu a sawi - Manchester City, Manchester United leh Chelsea-te chu Kane duhtu langsar an ni.

Poch-a hmachhawp
Ningani khan PSG chuan an coach Poch nena an in biangbiakna chu an tlangzarh a, Argentine coach hi club nena an hmachhawpte sawi zo hlim a ni.

Player a nih laia PSG tana lo khel tawh coach chuan, "Thil siamrem ngai a awm a, ka player-te rang taka an insiamrem mai thei kha ka lawm takzet. Chutihrual chuan inthlak danglamna tur tam tak a la awm a, hun kan la ngah tawk loh avangin kan tithei rih lo.

"Mahse, tuna kan thawhrim dan leh kan duhdante a ṭha zawka khelmuala kan lantir theih nana kan tuihalnate ka en hian thil ropui tak kan tithei tih ka hria a ni," a ti.

Poch-a leh PSG inkawmna en chuan Argentine coach hian chhuah lam a ngaihtuah lo tih a lang a, Spurs hian thiam taka an dawr erawh chuan beisei loh thil pawh thleng ve reng thei a ni tho.

Conte maw?
Khawthlang media-te titi ah chuan Spurs hian Inter Milan nena inṭhen Antonio Conte pawh lakluh tumin an dawr dawn - Italian coach hi pound maktaduai 17 hlawhtir an inhuam tih thlenga sawi a awm.

Conte hian Inter-ah khan season khatah pound maktaduai 11 a hlawh a, Spurs-ah pound maktaduai ruk ngawtin a hlawh hnem dawn tihna a ni - sum a tam miau chuan hnar a har ang.

Spurs hian Mourinho kha season khatah pound maktaduai 15 an hlawhtir nia sawi a ni a, Conte tan pound maktaduai 17 sen hi an harsat lo ang - Italian boss hi Real Madrid nen sawizawm a ni bawk.

Hriat tel tur erawh Conte hi club neitu lam tan coach thawhpui nuam tak a ni lem lo - Spurs club chairman, mahni thu duh ve tak Daniel Levy nena thawkdun tura ngaihtuah an harsa!