LA Lakers an chungnung

Los Angeles Lakers chuan nimin zing khan Phoenix Suns lakah 109-95 in hnehna an chang a, NBA playoff khelh laiah 2-1 in hma an hruai mek a, tlang turin beiseina an nei sang leh ta hle.

An match hnuhnung zawk ang bawkin Anthony Davis a khel ṭha, point 34 a neih bakah rebound vawi 11 ngawt a la. LeBron James-a'n point 21 a nei bawk a, fans 7500 vel hmaa inkhelah an chungnung zawk.

Inkhel dangah Milwaukee Bucks chuan Miami Heat 113-84 in an hneh a, Eastern Conference playoff series-ah 3-0 in hma an hruai, vawi khat an chak leh a nih chuan an tlang dawn tihna a ni.

Nikola Jokic-a point 36 leh Austin Rivers-a point 21 hmangin Denver Nuggets chuan Portland Trail Blazers 120-115 in an hneh a, series-ah 2-1 in hma an hruai ve mek bawk - Inrinni zanah game 4 an khel leh ang.