Kum khat hnuah Pirlo an ban

Juventus chuan season khat chauh an chhawr hnuah Andrea Pirlo chu an coach aṭangin an ban. Italian club hian tun hma lama an rawih tawh Massimiliano Allegri chu an chhawr zui leh ngei dawn niin a lang ta.

Nikum nipui lai khan Maurizio Sarri thlaktu atan manager hming langsar tam tak sawi rik an ni a, mahse tawnhriat nei lo Pirlo chu lakluh a ni. Old Lady hian 2021 hnua a vawi khat nan Serie A title an la lo a, palina dinhmun an luah hram.

Pirlo kaihhruaina hnuaiah hian Coppa Italia title chu an la ngei a, mahse Juve tan a laka rinna nghah chhunzawm nan a tawk zo lo. Season thara Champions League an khel phak hram tur erawh coach leh player thar zawn kawngah a ṭangkai thei ang.

Kan lawm e
Juventus thuneitu lamin Pirlo an rintawk thu leh, season tharah pawh an coach a nih chhunzawm tur thu an sawi fo. Mahse, an duh leh beisei ang an thlenpui miau loh avangin a dinhmun ngai a chelh chhunzawm thei ta lo.

Turin club chuan thuchhuah siamin, "Andrea kan lawm e, he thu hi kan zavaia kan sawi theih hmasak ber chu a ni. Hun rei vak lo kal ta khan Andrea Pirlo hian team enkawl hna a thawk ṭan a, player a nih laia khawvel ngainat a hlawh ang ngeiin coach a nih hnuah pawh ngaihven a hlawh.

"Hripui leng vanga khawvelin hun harsa a tawh laiin club a kaihruai a, club tan theihtawp chhuahin hmasawnna tam tak a rawn thlen. San Siro leh Camp Nou-ah inkhel ropui min chhawp chhuahsak te kha kan hrereng ang, i kal zelna turah thinlung takin duhsakna kan hlan che," an ti.

A thlaktu Allegri?
Juventus hian Serie A mai ni loin Champions League thlenga hlawhtlin an duh, chuvangin manager ṭha tawk tak an mamawh. Italian football chanchin ziaktu langsar 'Football Italia' chuan Pirlo thlak tur hi Massimiliano Allegri a nih thu an tarlang.

Football Italia tarlan dan chuan Allgeri hian a club hlui tan hian season thum daih contract chu Ningani zan khan a ziak fel tawh a, coach thar a nih thu hi nizan khan an puang chiang ang, he thu i chhiar chuan Juve manager chu Allegri a ni tawh dawn tihna a ni.

Italian manager Allegri hian 2014-19 chhung khan Juventus hi a lo enkawl tawh a, Serie A title a zawna vawi nga a chawipui bakah Champions Legue final vawi hnih a luhpui bawk - tunah chuan UCL champion pui a tum ang.

Pirlo hma hun
Player a nih lai chuan Pirlo aia hlawhtling an tam bik lo ang. Juve tana match 164 a khelh aṭangin Serie A title vawi li a la a, AC Milan tana a khelh laiin Champions League nomawi vawi hnih a chawi bawk.

Inkhelh a chawlhsan hnuah team enkawl lam a luhchilh nghal, tawnhriat nei miah loin Juventus a enkawl a, coach nih chu thil awlsam leh hlawhtlin pui nghal ngawt theih chu a lo ni bik lo, zir tur a la ngah hle.

Italy rama chanchinbu ṭhenkhat chuan Pirlo hi Sassuolo enkawl tur angin an ziak. Season hman zawh takah khan Sassuolo hi table-ah pariatna an ni a, an che chhe hran lo. Coach patuai Pirlo hian a zawm a nih chuan intuaihriamna hunṭha a ni ang.